Г.М : Монголыг их сайхан орон гэж боддог байсан. Энд ирээд хоттой ойрхон газар салхинд гараад энэ бодол маань илүү баттай болсон. Монголчууд байгальтайгаа ойрхон байдаг ард түмэн юм. Уул, ус, тал газар нь сайхан санагдсан. Ийм сайхан байгальтай учраас аялал жуулчлалыг, тэр дундаа эко жуулчлалыг хөгжүүлбэл уул уур­хайн салбараас дутахгүй ашигтай байж чадна гэдэгт итгэж байна. Дараа ирэхдээ хөдөө  заавал явна гэж төлөвлөж байгаа.

М.Л : Онгоцны буудлаас хот руу явж байхад дэлгүүрийн хаяг, сурталчилгааны самбарууд ихэнх нь англи хэл дээр байсан. Хятадад бол тэдгээрийг англи хэл дээр бичих журамтай. Танай орны хувьд англи хэлийг эрчимтэй сурч байгаа юм байна гэж ойлгосон. Монголд ирээд цөөн хоносон болохоор зөвхөн нийслэлийг нь л үзлээ. Орчин үеийн сонгодог барилгын загварыг хуучин загвартай хослуулсан, Азийн бусад орноос ялгагдах өвөрмөц онцлогтой хот юм. Азийн орнууд шиг л битгий хөгжөөрэй гэж хэлмээр байна.

-Яагаад ингэж хэлэв. Битгий хөгжөөрэй гэдэг ерөөл байдаг гэж үү?

М.Л : (инээснээ) Уучлаарай, би тийм утгаар хэлээгүй юм шүү. Азийн орнуудад явж байхад дэл­хийн нэртэй рестораны сүлжээний хаяг, тухайлбал McDonald's эсвэл  пиццаны алдартай компаниудын хаяг, брэнд бүтээгдэхүүний дэлгүү­рүүдийн хаяг эрээлжлэн харагддаг. Тийм үед аль улсад явж байгаагаа ойлгохоо больдог. Эдгээр хот шиг хөгж­вөл Улаанбаатар хот биш болно. Танай нийслэл арай өвөрмөц. Нэг талаар, интерна­ционал хот юм шиг санагдсан. Хятад, Солонгос, Орос тэр ч бүү хэл Кубын ресторан харагдсан. Гадаадынханд өвөрмөц харагдах энэ байдлаа бүү алдаасай гэж хүссэн учраас дээрх ерөөлийн үгийг хэлсэн юм шүү.

Мэдээллийн спонсор: Нийгмийн толь