Ц.Элбэгдорж: Үнэхээр үнэний төлөө яваа юм бол нэр дэвшигч нь надтай улаан нүүрээрээ ярилц

Өнөөдөр 9 цаг 46 минут

Монгол Улсын Ерөнхийлөгчид нэр

дэвшигч  Цахиагийн ЭЛБЭГДОРЖ         

сонгогчидтой хийсэн уулзалтын

үеэр сонгогчдын асуултанд зарим

гүтгэлгийн талаар өгсөн хариултыг

түүний хэлснээс товчлон авав.

Үнэхээр үнэний төлөө яваа юм бол нэр

дэвшигч нь надтай улаан нүүрээрээ ярилц.

Би Энхбаяр нэр дэвшигчийг 2 долоо хоногийн өмнө халз мэтгэлцээнд урьсан.

Би гүтгэлгээ зогсоо. Бодлого ярьж өрсөлдье гэж би өрсөлдөгчөө уриалсаар байна.

Хэдэн үл бүтэх хүмүүсийг ашиглаад Монголын ард түмний хувь заяаны сонголтыг будилуулах гэж бүр улаан цагаандаа гарлаа. Нөгөөдүүл нь хүн гүтгэж, хуурамч ярилцлага хийснийхээ төлөө Солонгос даяар эрэн сурвалжлагдаж байгаа. Эд нар бодлого ярьж уралдаж чадахгүйгээ харууллаа. Авлига, ядуурал, ажилгүйдэл, шударга бус байдал, төрөөс төрсөн тэрбумтнуудын тухай ярих ч чадал, хүсэл эдэнд алга.

Би бол үүнийг л өөрчилье гээд байгаа.

Эд ард түмнээ хуурах, хүн гүтгэх болохоороо 1,5 сая гэсэн тоо ашиглах юм. 1,5 саяас өөр тоо мэддэггүй юмуу! 1,5 сая вон бол 1,5 сая төгрөг. Солонгост ажиллаж байгаа манай залуугийн 1 сарын цалин. Солонгост ийм цалингийн төлөө 30 гаруй мянган монголчууд ажиллаж байгаа. Намайг гүтгэх яахав. Тэдний минь амьдралд энэ гүтгэлэг нь цохилт болох бий гэж би санаа зовж байна.

Тэр хүмүүсийн ажил амьдрал надад үнэтэй. Энд байгаа ар гэрийнхнийх нь амьдрал ч надад үнэтэй. “Эх орон үнэгүй” гэж хэлдэг улсууд ард түмний маань шударга сонголтыг хэдэн воны гүтгэлгээр худалдаж авах гэж улай үзсэн юм шиг шаагилдаж байна. Би үүнийг  зөвшөөрөхгүй. Үүнийг өөрчилье. Эцсээ хүртэл ард түмнийхээ ажил амьдралын үнэ цэнийн төлөө явна, тэмцэнэ. Эрх мэдэлдээ үлдэхийн төлөө юу ч хийхээс буцахгүй байгаа энэ байдлыг өөрчилье гэж би энэ сонгуульд өрсөлдөж байгаа.

Миний Монгол улсын Ерөнхийлөгчид нэр дэвшигчийн үнэмлэх энэ байна. 4-р сарын 4-нд авсан. Сонгуультай холбох гэж байгаа бол наад зах нь сонгуулийн хугацаанд болсон асуудлаар гүтгэ л дээ. Сонгуулиас 20 хоногийн өмнө  Монгол Солонгосын оюутнууд, их дээд сургуулийнхан, төрийн бус байгууллагынхантай хийсэн лекц ярианы бичлэгт сая 500 мянган вон өгсөн гэсэн гүтгэлгийн бичлэг зүүж ашигласан байгаа юм. Миний бүх үйл ажиллагаа хүмүүсийн нүдэн дээр ил байдаг. Одоо харин тэр мөнгө өгсөн гээд байгаа эрэн сурвалжлагдаж байгаа тэр үл бүтэх хүмүүс, гүтгэлгийн хань хамсаатнуудыг Солонгосын цагдаа барина гэж найдаж байна. Би дахин хэлье. Ямар ч гүтгэлэг намайг ард түмнийхээ төлөө, шударга ёсны төлөө зүтгэл, үйл хэргээс буцааж чадахгүй. Энэ сонгуулийн хугацаанд тэд миний аман дэх бохьтой бас ноцолдсон. Эд миний амандаа хийсэн бохьтой тэмцдэг. Би тэдний аминдаа завшсан тэрбум тэрбум төгрөгтэй тэмцдэг. Би бохь зажлахаа болъё гэсэн. Харин энэ авлигачид ард түмний хөрөнгөнөөс хулгайлахаа болих хэрэгтэй.

Үнэхээр үнэний төлөө яваа юм бол нэр дэвшигч нь надтай улаан нүүрээрээ ярилц. Би Энхбаяр нэр дэвшигчийг 2 долоо хоногийн өмнө халз мэтгэлцээнд урьсан. Би гүтгэлгээ зогсоо. Бодлого ярьж өрсөлдье гэж би өрсөлдөгчөө уриалж байгаа.