Эмэгтэй хүний янз бүрийн дотуур хувцасны тухай өгүүлье. Бүсгүйчүүдийн дотуур өмд гэхэд хэчнээн янз гэж бодно.Үндсэн хэд хэдэн төрөл байдаг. Үүнд:

1. Стринг. Энэ нь ар тал нь ердийн, бүтэн хонгоны талыг хаадаг, урд тал нь умдгийг бүхэлд нь хаадаг хувцас. Хоёр ташаан дээрх хэсэг нь өргөн, нарийн янз бүр байна. Хэвлийн доод хэсэг бүхэлдээ хаагддаг, дээд эмжээр нь бэлхүүсний тойргоор таарна. Стрингийн урд тал нь араасаа нарийн, умдагийг далдлах хэмжээтэй байна. Эмэгтэй хүний хамгийн өргөн хэрэглэгддэг дотуур өмд юм. Харин зарим эмэгтэйчүүд “хонго хуваадаг” гээд бариувтар хувцсан дотор өмсөх төдийлөн дуртай биш байдаг.

2. Бой лег. Энэ нь манайхны хэлдгээр “доор суулттай” буюу, дээд ирмэг нь хүйсний доогуур ирдэг, хоёр хажуу нь өргөн, нийт хувцасныхаа өндөртэй бараг адил хэмжээтэй байна. Бой легийг дэлгэж тавибал тэгш өнцөгт хэлбэртэй харагдана. Боксёрыг бодвол богино, бие барьсан хувцас. Хоёр хонго бүтэн далд ордог тул хүүхнүүдийн хэлдэг “хонго хуваагдах” аюул байхгүй. Гэхдээ хэвлийн дээд хэсгийг бараг хаадаггүй тул гэдэстэй, махлагдуу хүүхнүүд барагтай өмсдөггүй.

3. Пенти. Энэ нь бүтэн суулттай, хоёр ташаан дээр ирэх хэсэг нь өндөр мөртөө нарийн, дэлгээд тавихад Т үсэг хэлбэртэй санагдана. Урд ар тал нь хэт өргөн биш, гэхдээ тонг шиг ганц ар нь нарийн биш, аль аль адилхан нарийн байж болно.

4. Tонг. Энэ бол эмэгтэйчүүдийн хамгийн дэгжин, эмзэг, нарийн хувцас гэж хэлж болно. Эвгүй татахад тасарчихмаар. Ар тал нь нарийн, 2-3 см-аас хэтэрдэггүй, зарим нь бүр утас шиг бөгөөд хонгон завсар орж өмсөгдөнө. Голдуу бүтэн суулттай, өндөр, урд хэсэг нь умдгийг бүрэн хааж, харин хоёр хонго нь бүхэлдээ ил байна. Ар тал нь нарийн тул ташаан толгой дээр ирэх хэсэг нь мөн голдуу нарийн. Гэхдээ бикини шиг жигд байх нь бий. Тонг нь ар тал нь доор, аль нэг тал нь торон, төрөл бүрийн зураг дүрстэй байж болно. Ихэвчлэн хүүхнүүд маань үүнийг ац гэж нэрлэх нь бий.

5. Боксёр. Энэ нь шууд утгаараа боксчины “шорт”-ыг санагдуулна. Гэхдээ эрчүүдийнхийг бодвол арай богино, сул байна.

6. Бикини. Бикинигийн хоёр ташаан толгой дээр ирэх хэсэг нь нарийн мөртөө, ар урд тал нь адилхан хэмжээтэй. Өөрөөр хэлбэл ар тал нь стрингийг бодвол нарийн тул хонгыг бүрэн хаахгүй. Дээд эмжээр нь тэгш, ташаан хэсэг нарийн тул нухахгүй. Бэлэг эрхтэн нь бүхэлдээ далдлагдана. Ер нь бикини, стринг хоёр хослосон загварын хувцас элбэг байдаг.

7. Татуурга. Эмэгтэйчүүд биеэ гуалиг сайхан харагдуулахад нөлөө бүхий хувцас. Энэ нь маш бага суналттай зузаан резинээр хийгдсэн, биеийг чанга барьж хэлбэрийг нь засч харагдуулах үүрэгтэй. Дан татуурга, хонго, тааз гаргагч зориуд нэмэлт оруулгатай болон тонг-татуурга /энэ нь зөвхөн хэвлийг дарж гэдэс багатай харуулах үүрэгтэй/ боди-татуурга гээд олон янз байдаг.

8. Шемиз. Энэ нь франц үг бөгөөд гагцхүү эмэгтэй хүнд зориулан торго, сатин, тороор голдуу хийдэг чамин дотуур хувцас юм. Шемиз нь унтлагын даашинз шиг чөлөөтэй унждаггүй, бие барьсан, богино, өөрөөсөө хөхөвчтэй байна. Харин тедди, боди шиг өөрөөсөө дотуур өмдтэй биш, дотуур нь тусад нь /голдуу бикини, тонг/ өмсөх зориулалттай. Гоёлын даашинз, банзалны дотуур ихэвчлэн өмсөнө.

9. Бэйбидолл /Babydoll/. Үгчлээд орчуулбал хүүхдийн тоглоом гэсэн үг юм. Энэ нь шемизээс онц ялгаагүй ч харьцангуй чөлөөтэй байдгаараа унтлагын даашинз мэт боловч мөн нимгэн хувцас, гоёлын даашинз дотор өмсөнө. Стриптизийн бүжигчид дан бэйбидолл голдуу өмсдөг.

10. Унтлагын даашинз. Энэ нь урт богино, шулуун салбагар олон янз байна. Биед эвтэй зөөлөн эдээр хийдэг, өмсөж унтах зориулалттай. Загвар нь янз бүр байж болно.

11. Хослол /set/. Сет буюу хослол нь хөхөвч, өмд хоёроос бүрдэнэ. Гэхдээ хөхөвч нь ердийнх шиг биш, зөвхөн хөхний хэлбэрийг гаргаж, толгойг нь далдалсан, нарийн чамин хийцтэй байна. Голдуу тонг загвараар хийгддэг өмд нь мөн маш бага эд орсон, эмжээр шиг нарийхан хийцтэй байдаг ажээ.

12. Наалддаг хөхөвч. Энд мөн нэг нууц хуваалцахад энгэр, ар, цээж, мөр нь ил гарсан хувцас өмссөн хүүхнүүд хөхөвчгүй мэт харагддаг шүү дээ. Гэтэл үгүй ээ, тэд хөхөвч зүүдэг аж. Харин яг биеийн өнгөтэй силикон болон наалдамхай эдээр хийгдсэн хоёр аяга л байдаг юм байна. Энэ нь ялангуяа жижиг, унжгар хөхтэй хүүхнүүдэд хөхнийхөө хэлбэрийг засахад нь тусалдаг онцгой ачтай эд юм.