2012 он Лондонгийн олимпийн тоглолтод эмэгтэй боксын төрлийг оруулах талаар хүчтэй ярьж эхэллээ. Тухайлбал, Олон улсын олимпийн хорооноос 2012 оны зуны спортын XXX их наадмын хөтөлбөрт эмэгтэй боксын төрлийг оруулах эсэх шийдвэрээ ирэх наймдугаар сарын 13-нд Берлин хотноо гаргах аж. Одоогоор Олон улсын сонирхогчдын боксын холбооноос эмэгтэй төрлийг оруулах санал дүгнэлтээ олон улсын олимпийн хорооны хөтөлбөрийн хороонд хүргүүлснийг хүлээн авч тус газрын гүйцэтгэх зөвлөлөөр хэлэлцүүлэх юм байна. Өнгөрсөн сарын сүүлээр болсон Бүх Хятадын эмэгтэй боксчдын аварга шалгаруулах тэмцээнд оролцсон хятадын 158 боксчин, дасгалжуулагчид, ивээн тэтгэгчид санал нэгтэйгээр эмэгтэй боксын төрлийг олимпийн төрөлд оруулах саналыг дэмжиж байгаагаа илэрхийлэн гарын үсгээ зуран Олон улсын сонирхогчдын боксын холбоонд хүргүүлжээ. Хятадуудын хувьд 2008 онд Дэлхийн аварга шалгаруулах эмэгтэй боксчдын тав дахь удаагийн тэмцээнийг Нинбо хотод зохион байгуулан таван алт, Канад хоёр алт, Энэтхэг, Израйль, Турк, Ирланд, Польш, БНАСАУ тус бүр нэг алтан медаль авсан байна. Мөн АНУ, Шведийн шилдэг эмэгтэй боксчид энэхүү үйл ажиллагааг дэмжиж байгаагаа илэрхийлсэн байна. Үүний зэрэгцээ улс орнууд эмэгтэй боксчдын аваргаа тодруулж бас Чех-Унгар, Швед-Энэтхэгийн эмэгтэй боксын багуудын уулзалт зохиогдсон байна.