Монгол Улсын иргэн Ш.Алтантуяаг хөнөөсөн малайзийн цагдаагийн ажилтан А.Хадри, С.А.Умар нарт тус улсын Дээд шүүхээс цаазаар авах ял сонсгожээ. А.Хадри, С.А.Умар нарыг монголын иргэн Ш.Алтантуяагийн амийг хөнөөж 2006 оны аравдугаар сарын 19-ны өдөр цогцсыг нь дэлбэлсэн хэрэгт буруутай хэмээн үзжээ.
Тэднийг шүүх ажиллагаа нийт 159 хоног үргэлжилсэн бөгөөд Дээд шүүхийн шүүгч З.Ясин “хэрэгтнүүд хоёул нэг нэгнээ буруутгаж байсан” гэжээ.
Малайзын Ерөнхий сайдын орлогч асан одоогийн Ерөнхий сайд Нажиб Разакийн зөвлөхөөр ажилллаж байсан Абдул Разак Багиндаг тус хэрэгт холбогдолгүй хэмээн өнгөрсөн оны 11 дүгээр сард тус улсын Дээд шүүхээс тогтоосон юм.
Гэвч одоогийн Ерөнхий сайдтай холбоотой уг хэрэг тийм ч амархан замхрахгүй нь бололтой. “Энэ хоёр хэрэгтэн Ш.Алтантуяаг алах ямар ч шалтгаан байгаагүй. Тэд түүнийг урьд нь таньдаг ч үгүй байсан. Уг аллагад буруутай өөр хүмүүс байгаа нь тодорхой юм. Тиймээс тэдний хувьд ямар нэг зүйл хийх хэрэгтэй гэж бодож байна” хэмээн талийгаачийн гэр бүлийг төлөөлж байсан өмгөөлөгч Карпал Сингх ярьсан байна.
Дүүжлэн хороох ял сонссон хоёр ялтны царайг даавуун нөмрөгөөр далдалж цагдаа нарын хамгаалалтан дор авч гарсан байна. Хэрэгтнүүд шүүхийн тогтоол сонссон сүүлийн өдөр хүртлээ суллагдана гэсэн нэлээд итгэлтэйгээр шүүх хурал дээр биеэ авч явсаныг тус улсын хэвлэлүүд бичиж байсан юм. Шүүхийн тогтоол сонсоод тэд хоёул давж заалдахаар шийдсэн тухай мэдээлжээ.
Одоо талийгаачийн эцэг С.Шаарийбуу Малайзын Засгийн газар, Цагдаагийн газрынх нь эсрэг үүсгэсэн заргаа үргэлжлүүлнэ хэмээн Малайзийн сонинууд мэдээлж байна. С.Шаарийбуу учирсан хохирлоо 30 сая ам.доллараар үнэлсэн юм.

Д.Мөнхболд