Өнөөдөр Төгөлдөрийн хувьд аз гийсэн өдөр байлаа. Дүн өвлийн хүйтэн орой байсан хэдий ч дан цамцтай байшин тойрон гүймээр санагдлаа. Өнөөдөр Төгөлдөр тушаал дэвшин хэлтсийн даргаар томилогдон компанийн захирал түүнд багагүй үүрэг хариуцлага бас итгэл хүлээлгэн өгчээ. 10 гаруй хүнтэй алба толгойлох болсондоо Төгөлдөр өөрийн эрхгүй баяртай байлаа, саяхан л жирийн нэгэн инженер байсан биш үү. Одоо ажилдаа улам их өөрчлөлт шинэчлэлтүүдийг хийж, бодож байсан олон зүйлээ ажил болгоно доо. Төгөлдөр тэр даруй ажил тарахыг хүлээлгүй утсаа шүүрэн авч хэсэг нөхөдрүү залгаад сэтгэл хангалуун гарч товлосон зоогийн газарлуу зүглэн одлоо. . . Баасан гариг болоод ч тэрүү хөл хөөр ихтэй газар булангийн ширээнд тухлан суулаа. . .

Уянга ажлаа тараад ээжийнхээ гэрээр дайран охиноо авахаар явлаа. Хаалга нээгдэнгүүт инээд алдан дэвхэцсээр охин нь тосон ирлээ. Уянга цай ч уулгүй охиноо хувцаслан аваад харихаар яарлаа, эмээ баяртай хэмээгээд бяцхан охин нь дэвхрэн дэгдсээр Уянгад хөтлүүлэн гарлаа. Уянга охиноо хөтлөлцөн гэртээ хариад зурагтаа залгаж орхиод хоолоо хийж эхлэв. Одоо дөнгөж л 4 настай охинтойгоо цэцэрлэгийн сонин хачныг яриулан инээсээр суутал нэг цаг хартал 21 цаг өнгөрч байхаар нь утсаа авч Төгөлдөрлүү залгатал хэсэг дуудаж байгаад таг боллоо. Өнөөдөр бас л хэмээх бодол Уянгаагийн толгойд харван орж ирлээ. Сүүлийн жилүүдэд Төгөлдөрийн утсаа таслан алга болж шөнөдөө халамцуу ирэх нь эрс ихэссэнд Уянга битүүхэн түгших болсон билээ. Хаа очиж Төгөлдөр согтуу ирээд элдэв зан гаргана гэж үгүй, хичнээн ч согтуу байлаа гэсэн охиноо сэрээчихнэ гээд өлмий дээрээ сэм гэтсээр орж ирэх нь эхэндээ Уянгад их л инээдэмтэй санагддаг байсан сан. Тэгээд л охиноо заавал хэсэг өхөөрдөн харж байж орондоо ордог зуршилтай болсон. Ялангуяа байнга хамт уудаг хэдэн нөхөдтэй болсонд нь Уянга туйлын ихээр дургүйцэвч энэ тухай нь хэд хэд хэлээд сүүлдээ хэрүүл болж дууссан билээ.

Эхэндээ ганц 2 пиво уугаад гээд орж ирэхэд нь Уянга төдийлөн тоодоггүй байсан ч сүүлдээ уух нь олширч, хэд хэдэн удаа гуйвлан ирэхэд нь охиноо ээжийндээ өгч байгаад сүрхий зэмлэн анх удаа Төгөлдөр тэр 2 хоорондоо зад хэрэлдэж үзжээ. Уянга охиныхоо дэргэд муудалцахыг хүсдэггүй болохоор хагас сайн өдрийг хүлээж байгаад ёс юм шиг л хэрүүл өдөж уурлаж, уйлж уцаарлаж эхэлдэг болсон билээ. Энэ нь Төгөлдөрт харин ч гэртээ харих, тэр тусмаа хагас сайн өдөр охиноо өгч явуулаад Уянгатай хэрэлдэж өнжинө гэж бодохоор л өөрийн эрхгүй үстэй толгой өрвийж гэртээ харих ч хүсэлгүй болсоор удаж байгаа билээ. Харин хаа очиж Төгөлдөр шиг сайн аав байхгүй бөгөөд ганц амин сүнс нь бяцхан охин нь байлаа. Аавынхаа хацарт булцгар ягаан хацраа нааж байгаад Төгөлдөрөөр юу л хийлгэе гэнэ дураараа хийлгэдэг ганц хүн нь түүний бяцхан охин нь болсон билээ. Сүүлийн 1 жилийн турш иймэрхүү маргаантай амьдарсаар сүүлдээ Уянга ч өөрөө хэрүүлээс залхаж гүйцлээ. Хичнээн ч уурлаад Төгөлдөр өөрийгөө их ууж байна гэж зөвшөөрдөггүй бөгөөд ажлаа тараад ганц нэг пиво уугаад харихад буруу юу байна гэж баттай бодох болжээ. . .

Өнөөдөр бас л ууж байгаа биз шөнийн 2 цагийн үед нэг л их пиво ханхлуулсан хүн ирж хэрэгтэй юм шиг охиноо гөлөрч өнгийнө биз. Уянга өөрийн эрхгүй дургүйцэн ирэхээр нь тосч байгаад зад хэрэлдмээр санагдлаа, даанч хүүхдийн хүмүүжлийн тухай өөрийн онолтой болохоороо тэр хэзээ ч охиныхоо дэргэд бие биеэ хялайж хэрэлдэж байгаагүй билээ. Өдөржин цэцэрлэг дээрээ тоглож өнжсөн охиноо унтуулаад, аяга өтгөн кофе хийж аваад зурагтынхаа өмнө тухлан суугаад амьдрал нь яагаад ийм болсоныг эргэцүүлэн бодож өнгөрсөн амьдралаа нэгд нэгэнгүй эргэн санах гэж хичээлээ. Уянгад цаг хангалттай байлаа, Төгөлдөр тэртээ тэргүй шөнөөс нааш ирэхгүй . . .