Оруулсан bataka
Өлөгчин гийнана
Ингэ гунганана
Ижий өмөлзөнө
Энэ ертөнцийн ижий бүхэн
Элгээ эмтэлж урласан
Эх цэнхэр дэлхийг
Өөрөөсөө амь тасалж
Үндэс зулж үргэлжлүүлсэн
Өөрөөсөө өөр нутаггүй
Өнчин цэнхэр дэлхийг
Өлөгчин улина
Ингэ буйлна
Ижий уйлна
Энэ ертөнцийн ижий бүхэн
Нулимс цувуулж хэлхсэн
Эх цэнхэр дэлхийг
Өөрөөсөө урсаж
Сүүн ундарга ивлүүлсэн
Өөрөө өөрийгөө ундаалдаггүй
Гандуу цэнхэр дэлхийг
Өлөгчин гийнана
Ингэ гунганана
Ижий дуулна
Энэ ертөнцийн ижий бүхэн
Бүүвэй аялж гийгүүлсэн
Эх цэнхэр дэлхийг
Зөөлөн уянга цацрааж
Дуун цацал цалгиасан
Өөрөөсөө өөр эгшиггүй
Солгой цэнхэр дэлхийг
Эв зүйж таталсан
Он цагийн улбаатай
Эрсэж тэрсэж учруулсан
Од сарны зовлонтой
Энэ ертөнцийн ижий бүхэн
Уйлж дуулан өмөлзөж
Элгээ эмтэлж урласан
Эх цэнхэр дэлхийг
