Монгол улс АНУ-ын хооронд өндөр хэмжээний айлчлал болох үеэр хөндөгддөг асуудал бол хоёр улсынхооронд 90 хоног визгүй зорчих талаар хөндөгддөг. Гэвч албан ёсоор хоёр тал хэлэлцэж тохиролцсон  зүйлгүй байгаа. Нуулгүй хэлэхэд, Монгол Улсыг АНУ-д визгүй зорчдог орнуудын жагсаалтад (visa waiver program) оруулахад хүндрэлтэй зүйл бий гэнэ. Жишээ нь, виз олголт хангалттай хувьд хүрч чадахгүй байна. АНУ-д визгүй зорчдог орнуудын жагсаалтад багтахын тулд тухайн орны виз хүсэгч иргэд татгалзах хариу авдаг явдал таван хувиас бага байх ёстой. Энэ түвшинд хүрэхийн тулд нэлээд хугацаа орно. Жишээлбэл, БНСУ-ын иргэд энэ жилээс АНУ-д визгүй зорчдог боллоо. Бараг 1950-иад оноос хойш яриа хэлэлцээ хийсээр ийм үр дүнд хүрсэн. Гэхдээ Монгол Улс үүнд хүрэхэд тус улс шиг 50 жил шаардагдах болов уу. Монгол Улсын эдийн засаг хурдацтай өсөж, байгалийн баялаг, нөөц боломжоо үр ашигтай зарцуулж, түүнээ гадаадад экспортолбол түүнээс бага хугацаанд визгүй зорчих хэмжээнд хүрнэ гэж итгэж байна хэмээн АНУ-аас Монгол улсад суугаа элчин сайдын яамны ерөнхий консул Роберт Поул хэлж байх юм.

 Нийт виз авсан монголчуудын дунд визийн хугацаа хэтрүүлэх, АНУ-д хууль бусаар үлдэх явдал нэлээн их. Ер нь АНУ-ын Конгрессийн баталсан хуулиар бол, Монгол гэлтгүй дэлхийн аль ч орны жуулчны виз авахаар өргөдөл гаргасан иргэдийг тус улсад үлдэх, цагаачлах зорилготой гэж үздэг л дээ. Энэ ойлголтыг давж, эх орондоо эргэж ирнэ гэдгээ нотлох хэрэгтэй. Өөрөөр хэлбэл, АНУ-д богино хугацаагаар зорчсоныхоо дараа эх орондоо зайлшгүй эргэн ирнэ гэдгээ янз бүрээр нотолж болно. Жишээ нь, санхүүгийн талаас, үл хөдлөх хөрөнгө эзэмшдэг тухай, гэр бүлийн холбоос, өөрийн бизнес үйл ажиллагаа явуулдаг, эсвэл хариуцлагатай албан тушаал хашдаг гэх мэт олон зүйлээр нотолж болдог хэмээн үздэг аж.