Апачи омгийн домогт толгойлогч Жеронимогийн үр удмынхан Йелийн их сургууль болон тус сургуулийн оюутнуудын “Гавал ба яс” хэмээх нууц нийгэмлэгээс удирдагчийнхаа гавлын ясыг нэхэмжилж шүүхэд ханджээ.

Тэд Жеронимог нас барсны 100 жилийн ойг тохиолдуулан энэхүү нэхэмжлэлийг гаргасан байна. Домогт удирдагчийг 1909 оны хоёрдугаар сарын 17-нд Силл боомтын дэргэд шоронгийн оршуулгын газарт олзлогдсон апачи омгийнхон оршуулжээ. 1918 онд “Гавал ба яс” нууц нийгэмлэгийн гурван гишүүн шарилыг ухаж, гавлын ясыг авсан. Тэр гурвын нэг нь бага Жорж Бушийн өвөө Прескотт Буш байсан гэсэн яриа байдаг аж.

Нийгэмлэгийнхэн шинэ гишүүн элсүүлэхдээ Жеронимогийн гавлын ясыг үнсүүлдэг гэнэ.
 
Гэвч “Гавал ба яс” нийгэмлэгийнхэн удирдагчийн шарилыг ухсан хэрэгт огт хамаагүй хэмээн мэдэгддэг бөгөөд Йелийн их сургуулийн ажилтнууд Жеронимогийн гавлын яс байгааг үгүйсгэсэн байна.

Удирдагчийн ач хүү Харлин Жеронимо Жорж Бушт өвөөгийнхөө гавлын ясыг хайж олоход тус болохыг хүссэн боловч амжилт олоогүй ажээ.

Апачи овгийн толгойлогч Жеронимо 1858-1886 онд өөрийн овог, нутаг дэвсгэрээ хамгаалан Мексик болон Америкийн армитай тулалдаж байжээ. Жеронимогийн 38-хан хүнтэй отрядыг АНУ-ын армийн таван мянган цэрэг барих гэсэн оролдлого удаа дараа амжилтгүй болдог байжээ. 1886 оны есдүгээр сарын 4-нд Жеронимо отрядтайгаа Америкийн генерал Нельсон Майлзд бууж өгсөн байна.