Өнөөдөр Засгийн газрын ээлжит бус хуралдаан болж дараах асуудлыг хэлэлцэн шийдвэрлэв. Ерөнхий сайд С.Баяр Төсвийн тодотголыг өнөөдөр 18.00 цагт УИХ-ын даргад өргөн барихаар болжээ.

Гэрээний төслийг УИХ-д өргөн мэдүүлнэ

Оюутолгой, Тавантолгой ордыг ашиглах зорилгоор хөрөнгө оруулагчтай яриа хэлэлцээ хийж, хөрөнгө оруулалтын гэрээний төсөл боловсруулах Засгийн газрын Ажлын хэсэг Оюутолгойг ашиглах хөрөнгө оруулалтын гэрээний тухай болон түүнтэй холбогдуулан бусад хуульд нэмэлт, өрчлөлт оруулах тухай хуулийн төслүүдийг Засгийн газрын гишүүдэд танилцуулав.

“Айвенхоу майнз Монголиа инк”, “Рио Тинто” компанийн хамтарсан багтай явуулсан хэлэлцээний үр дүнд бэлтгэсэн 16 зүйл, 160 гаруй заалттай хөрөнгө оруулалтын гэрээний төсөлд

Ордод ашиглалт явуулах “Айвенхоу майнз Монголиа инк” ХХК-ийн 34 хувийг Монгол Улсын Засгийн газар шууд эзэмших, гэрээг сунгаснаас хойш нэг жилийн дотор Монголын талд нэмэлт 16 хувийг шилжүүлэн 50 хувьд хүргэх

Монголын талын хөрөнгө оруулалтын зардлыг хүүгийн хамт ирээдүйд манай талд ногдох ногдол ашгаас тооцох

Манай тал 125 сая ам.долларыг урьдчилгаа төлбөрт тооцон авах

“Айвенхоу майнз Монголиа инк” ХХК нь Монгол Улсад хүчин төгөлдөр мөрдөгдөж буй хуулийн дагуу татвар, төлбөр, хураамжуудыг төлөх

Ордоос олборлосон алтыг Монголбанкинд тухайн үеийн зах зээлийн үнээр худалдах

Оюутолгой төсөл бүх хөрөнгө оруулалтаа 29.9 хувиар нэмэгдүүлэн  тооцож, нөхсөний дараах ашгаас 30 хувийн татвар ногдуулах

Зэс хайлуулах үйлдвэр байгуулах, түүнийг зөвхөн Монгол Улсын нутаг дэвсгэрт ажиллуулах

Олборлолтын үйл ажиллагаанд ашиглах техник, технологи нь байгаль орчинд хор нөлөө багатай, Монгол Улсын болон олон улсын дүрэм, стандартад нийцсэн байхаас гадна ордыг аль болох хаягдал багатай, өндөр үр ашигтайгаар бүрэн ашиглах

Засгийн газраас сонирхогч талуудыг оролцуулсан “Өмнийн говийн бүсийн хөгжлийн зөвлөл” байгуулах, хөрөнгө оруулагч компани зөвлөлийн гишүүн байж, үйл ажиллагааг идэвхтэй дэмжих

Эрчим хүчний хэрэглээг эхний 4 жилд БНХАУ-аас хангах, үүнээс хойших хугацаанд Монгол Улсын нутаг дэвсгэр дэх эрчим хүчний эх үүсвэрийг ашиглах, эрчим хүч үйлдвэрлэх барилга байгууламжийг Монголд ашигтай байршлыг сонгох, хөрөнгө оруулагч Оюутолгой орд болон Гашуун сухайтын хилийн боомтын хооронд олон улсын стандартын авто зам барих, төсөл хэрэгжих орчинд нисэхийн хөөрөх буух зурвас байгуулах

Төсөл ашиглалтад орсны дараа нийт ажиллагсдын 90 хувь нь монгол ажилчид байх зэрэг заалтууд орсон байна.

     Хуралдаанаар гэрээний тухай хуулийн төсөл болон түүнтэй холбогдуулан бусад хуульд оруулах нэмэлт, өөрчлөлтийн төслүүдэд Засгийн газрын гишүүдээс гаргасан саналыг тусган ҮАБЗ-д танилцуулж, Засгийн газрын лхагва гаригийн хуралдаанаар хэлэлцүүлэн, УИХ-д өргөн мэдүүлэх нь зүйтэй гэж үзэв.