Олон улсын жүдо бөхийн холбоо (IJF)-ноос тив, тивийн шилдэг жүдочдын 2008 оны амжилтыг харгалзан чансаа тогтоожээ. Энэ сарын 1-нд гаргасан чансааны жагсаалтын -100 кг-д Бээжингийн олимпийн аварга Найдангийн Түвшинбаяр хоёрдугаарт бичигдсэн байна. Энэ жинд манай тамирчин 2008 оны Бээжингийн олимпийн наадамд түрүүлж 125 оноо, Азийн аварга шалгаруулах тэмцээнээс хүрэл медаль хүртэж 20 оноо, Парисийн “Супер дэлхийн цом”-д дэд байр эзэлж 25 оноо цуглуулснаар нийт 170 оноогоор аман хүзүүджээ. Харин энэ жинд  Холландын тамирчин, олимпийн хүрэл медальт Хенк Грол 175 оноогоор тэргүүлсэн байна. Гавьяат тамирчин Х.Цагаанбаатарын хувьд жиндээ 13 дугаарт бичигдсэн байв.

Түүнчлэн өнгөрсөн оны олимпийн эрх олгох цуврал тэмцээнүүдэд амжилттай оролцож байсан Монголын эмэгтэй жүдочид энэ жагсаалтад нэлээд дээгүүр бичигдлээ. Тухайлбал, гавьяат тамирчин Х.Эрдэнэт-Од 68 оноогоор жиндээ аравдугаарт орсон бол гавьяат тамирчин Д.Цэрэнханд, ОУХМ М.Бундмаа нар 16-д, П.Лхамдэгд 18 дугаарт бичигдсэнээр ТОП-20-д багтсан байна.