Машиндаа суугаад явж байхад тав тухтай байдаг ч 100% аюулгүй гэсэн баталгаа үгүй. Машинаа зогсоох шаардлагатай үед гэнэт тоормос ажиллагаагүй болвол яах вэ? Юмыг яаж мэдэхэв, та доорхи алхамуудыг тогтоогоод аваарай.

Машинаа аюулгүй зогсоох 7 алхам:

1. Таны машины тоормос автомат уу, стандарт уу?
Та машинаа ямар төрлийн тоормостойг сайн мэдэж байх нь зүйтэй. Өнөө үед автомат тоормосны системтэй (АВS) машин олон болжээ. Автомат болон стандарт тоормосны  үйлдэл харилцан адилгүй байдаг. Автомат тоормос дээр хөлөө тавиад нэгэн жигд гишгэхэд тоормос автоматаар тохируулагддаг. Харин стандарт тоормосыг хурдаа сааруулахын тулд хөлөө олон дахин авч тавин гишгэж тохируулах хэрэгтэй байдаг.

2. Тоормос ажиллагаагүй болсон эсэхийг баттай мэд
Эхлээд тоормос дээрээ зөөлөн гишгэ. Хэрэв ямар нэгэн хариу үйлдэл мэдрэгдэхгүй бол хүчтэй гишгээд үз. Хөлний дор даралт мэдрэгдэж гишгэхэд хатуу байвал тоормос ажиллагаагүй болжээ гэсэн үг.

3. Хаазнаасаа хөлөө ав.
Машинаа зогсоохын тулд мэдээж эхлээд хурдаа багасгах хэрэгтэй. Тиймээс хаазнаасаа хөлөө аль болох хурдан ав.

4. Машинаа хамгийн тохиромжтой зүгт чиглүүл.
Хүн харж байгаа зүг уруугаа бие нь ч мөн ханддаг. Өөрөөр хэлбэл та сандарсан үедээ зөв чиг уруу биш харин мөргөчихгүй юмсан гэсэн зүйл дээрээ хараагаа төвлөрүүлснээс болж жолоодлогоо ч алдана. Тиймээс аль болох тайван байж хаашаа явах уу гэдгээ бодож, яг тэр зүг уруугаа анхааралаа төвлөрүүлснээр жолоогоо ч мөн зөв зүгт хандуулж чадна.

5. Замаас гар.
Боломжтой бол замын хажуу уруу эсвэл шороотой газар уруу машинаа гарга. Явж байсан зам солигдоход машины хурд ч мөн саардаг.

6. Гар тоормосоо тат.
Жолоодлогоо алдаж, тоормос ажиллагаагүй болсон үед гар тоормос буюу бидний хэлж заншсанаар кардаан тус болж болох юм. Гэхдээ та эхлээд хурдаа багасгахгүй бол гар тоормос татсан ч машин тань шууд зогсохгүйг анхаар. Гэнэт гар тоормос татахад хүчтэй доргилт үүсч болзошгүй.

7. Эцсийн арга.
Тоормос ажиллахаа больчихлоо, гэтэл зогсохгүй л бол хүн амьтан эсвэл бусад машиныг дайрчих гээд байдаг. Тэгвэл энэ үед хэрэглэж болох эцсийн нэг арга бол хүмүүсээс хол өөр ямар нэгэн аюул багатай зүйлийг мөргөж зогсох юм. Суудлын даруулгаа шалгахаа хэрхэвч мартаж болохгүй!!!  Хамгийн боломжийн бай бол замын хашлага болон тусгаарлах зурвас. Эсвэл мод, гэрлийн шон, эзэнгүй машин ч байж болно. Ингэж зогсох нь тодорхой хэмжээний хохирол учруулах боловч бусад хүмүүсийг гэмтээхгүйн тулд хийж болох эцсийн алхам юм.

Эцэст нь хэлэхэд та заавал тоормосоо ажиллагаагүй болтол нь хүлээх хэрэг юу байна. Машинаа үргэлж мэргэжлийн оношлогоо үзлэгт хамруулж, аюулд орохоос урьдчилан сэргийлэх нь шилдэг арга билээ.