Эрт үед бурхан амьтдыг цуглуулан “Шинийн нэгний өдрийн өглөө надад мөргөхөөр ирээрэй. Эхэлж ирсэн 12 амьтанд шагнал гардуулна.”хэмээн айлджээ. Олон амьтад шагнал авахын тулд бэлтгэл хийж, зарим нь ч яаж түрүүлэх вэ гэж “толгойгоо гашилгаж” эхэлжээ.
Үхэр гүйлтийн уралдаанд өөртөө итгэл муутай байлаа. Учир нь морь, нохой, бар зэргээс гадна гахай, туулай надаас хурдан гэж боджээ. Тиймээс үхэр түрүүлэхийн тулд бусдаас өмнө хөдлөх хэрэгтэй гэж бодож урьд өдрийнх нь шөнө замд гарчээ.
Бие хаа том, хурдтай амьтдаас түрүүлж, яавал 1-р байрт орох бол хэмээн хулгана бодсон ч үнэхээр боломжгүй болохыг ухаарч бусдын тусламжийг авах хэрэгтэй гэж боджээ. Сэргэлэн хулгана үхрийн бодлыг мэдэж нууцаар үхрийн сүүлэнд дүүжлэгджээ. Тийнхүү урт зам туулсны эцэст үхэр бурханы ордны өмнө очиж, хаалга нээгдэх үеэр хулгана ухасхийн үхрийн урдуур хамгийн түрүүнд орон 1-р байрт орсон байна. Ийнхүү овсгоотой хулганаас болж үхэр 2-т орсон ажээ.

Мэдээж түрүүлнэ гэж бодож байсан бар замдаа амралгүй хурдлан ирсэн хэдий ч  3-т орсон ба өөртөө итгэлтэй байсан туулай замдаа хэсэг дуг хийснээс болж 4-т орж түүний хойноос луу, могой, морь, хонь, сармагчин, тахиа, нохой, гахай зэрэг дэс дарааллаар очиж бурханаас 12 жилд орох эрх авчээ.

12 жилийн тухай домог яриа сонирхолтой байгаа биз?