Дэлхийд тэргүүлэгч Euromoney сэтгүүл Голомт банкийг
“Монгол Улсын шилдэг банк”-аар тодрууллаа

Банк санхүүгийн салбарын дэлхийд тэргүүлэгч сэтгүүл болох  Euromoney 7 дугаар сарын 7-ны орой “Euromoney Award for Excellence 2011” шагналын эзэн болсон дэлхийн шилдэг банкуудыг цахим хуудсаараа  дамжуулан албан ёсоор зарласан билээ. Уг нэр хүнд бүхий шагналыг гардуулах ёслолын ажиллагаа 2011 оны 7 дугаар сарын 14-ний Пүрэв гарагт Хонг Конгт болсон бөгөөд Монгол Улсын банк санхүүгийн салбарт тэргүүлэгч Голомт банк “The Best Bank in Mongolia – 2011” буюу 2011 оны “Монгол Улсын Шилдэг банк” шагналын эзэн боллоо.

Дэлхийд нэр хүнд бүхий Euromoney сэтгүүлийн сэтгүүлч, судлаачид жил бүр дэлхийн бүх улсын банкуудын санхүүгийн үзүүлэлт, тухайн онд бий болгосон ололт амжилт, улс орныхоо эдийн засаг, хөгжил дэвшилд оруулж буй хувь нэмэр, харилцагчиддаа үзүүлж буй байдал үйлчилгээний чанар, шинэ дэвшилтэт технологи нэвтрүүлсэн байдал зэрэг олон үзүүлэлтүүдийг нэгтгэн судалгаа шинжилгээ хийсний үндсэн дээр “Дэлхийн шилдэг”, “Бус нутгийн шилдэг”, “Улс орны шилдэг” банкуудыг тодруулдаг юм.

“Euromoney Award for Excellence 2011” шагналын комиссын зүгээс Голомт банкийг Монгол Улсын шилдэг банкаар шалгаруулах болсон үндэслэлдээ “Голомт банкны хамгийн гол онцлог бол байгууллагад зориулсан банкны үйлчилгээгээрээ улсдаа тэргүүлэгч бөгөөд нийт активаараа Монгол Улсын хамгийн том банк юм. Мөн түүнчлэн нийт активын өсөлтөөрөө Хаан, Худалдаа Хөгжлийн банкуудаас илүү өндөр өсөлтийг гаргасан. Гүйцэтгэх захирал Жон Финиганаар удирдуулсан уг банк өнгөрөгч онд өөрийн хөрөнгөө 54 сая ам.доллараас 104 сая ам.доллар болгон 2 дахин нэмэгдүүлсэн, үйл ажиллагааны ашиг нь 39 сая ам.доллар байгаагийн зэрэгцээ чанаргүй зээлийн хувь хэмжээг 2.1 хувь хүртэл бууруулсан зэрэг санхүүгийн болон үйл ажиллагааны бусад олон амжилтуудыг гаргасан байна” гэж дурьджээ.

Ийнхүү Голомт банкны зах зээлд тэргүүлэгч байр суурь, найдвартай байдал, санхүүгийн хүчирхэг үзүүлэлтүүд, харилцагчид үйлчлүүлэгчиддээ үзүүлж буй шилдэг үйлчилгээ, шинэ дэвшилтэт технологи бүхий шинэ үйлчилгээ нэвтрүүлсэн байдал зэрэг нь энэхүү нэр хүндтэй шагналыг хүртэх болзлыг хангажээ. Голомт банк нь 2010 оны санхүүгийн үзүүлэлтээр 1 их наяд 574 тэрбум төгрөгийн активтайгаар Монгол Улсын хамгийн том банк болсон бөгөөд  банкны салбарын нийт активийн 25 хувь, хадгаламжийн 30 хувь, картын бэлэн бус төлбөр тооцооны 60 хувь, олон улсын төлбөр тооцооны 60 хувь, гадаад худалдааны санхүүжилтийн 50 хувийг тус тус эзэлж салбартаа  тэргүүлэгч байр суурийг эзэлсээр байна.

Мөн түүнчлэн Голомт банк зөвхөн дотоодын төдийгүй олон улсын нэр хүнд бүхий байгууллагуудын итгэлийг хүлээсээр ирсэн. Өнгөрөгч онд болсон томоохон үйл явдлыг дурьдвал Голомт банк дэлхийд тэргүүлэгч хөрөнгө оруулалтын сан болох Арабын нэгдсэн Эмират улсын Абу Дабигийн Хөрөнгө Оруулалтын Зөвлөлтэй хоёрдогч өглөгийн зээлийн гэрээ байгуулсан байна. Энэ нь уг банкны дэлхийд тэргүүлэгч Кредит Свисстэй байгуулсан хамтын ажиллагаатай ижил төстэй бөгөөд Голомт банк нь дэлхийд тэргүүлэгч санхүүгийн байгууллагуудын итгэлийг хүлээж хувь эзэмших сонирхолд суурилсан гэрээ байгуулсан Монгол улсын цорын ганц банк болсон байна.