Иргэдийн харилцан зорчих нөхцөлийг хөнгөвчлөх тухай Монгол Улсын Гадаад харилцааны яам, БНСУ-ын Гадаад харилцаа, худалдааны яам хоорондын солилцох Ноот бичгийн төслийг хэлэлцээд УИХ-ын холбогдох байнгын хороотой зөвшилцөхөөр тогтов. Монгол Улсын Ерөнхий сайд С.Баярын энэ оны аравдугаар сард БНСУ-д хийсэн айлчлалын үеэр хоёр улсын энгийн паспорттай иргэдэд 90 хоногийн хугацаагаар зорчих виз олгож байхаар тохиролцсон. Энэ тохиролцоогоо ойрын хугацаанд хоёр улсын Гадаад харилцааны яам хооронд Ноот солилцох хэлбэрээр албажуулахаар шийдвэрлэсэн юм.
Түүнчлэн зорчих нөхцөлийг үе шаттайгаар хөнгөвчлөх замаар яваандаа харилцан визгүй зорчих боломжийг бүрдүүлэх чиглэлээр ажиллахаар ойлголцсон билээ. Дээрх тохиролцооны дагуу солилцохоор төлөвлөж буй Ноот бичгийн төсөлд Хоёр улсын Засгийн газар дотоодын хуулийн дагуу энгийн паспорттай иргэдэд богино хугацааны визийг олгохдоо 90 хоногийн нэг удаагийн виз олгох Дээрх нөхцөлөөр виз авч, харилцан зорчиж буй иргэд 90 хүртэл хоногоор оршин суух тохиолдолд тэднийг гадаадын иргэдийн бүртгэлээс чөлөөлөх тухай тусгасан байна.
Энэ талаар Гадаад харилцааны сайд С.Батболдоос тодруулахад “Визийн хугацааг сунгах, хөнгөвчлөх нь ямар нэг эрсдэл дагуулахгүй, эерэг нөлөө давамгайлна. Харин бүр визгүй болно гэсэн асуудал нээгдвэл иргэд их хэмжээгээр гадагш гарах вий гэсэн болгоомжлол төрөх нь зайлшгүй” гэсэн юм.

С.Боргил