БНСУ-ын Хууль зүйн яамнаас “ Гадаад иргэдийн аж амьдрал” нэртэй тус улсын иргэнтэй худ ураг барилдахыг судалгаа явуулж, үр дүнг нь саяхан танилцууллаа. Тус улсад амьдрахад хамгийн хэцүү зүйл юу вэ гэсэн асуултад оролцогчдын 59,1 хувь нь хэл ус, ёс заншлын ялгаа гэж хариулсан бол гадаад хүнийг алаг үзэх, дарамтлах 8,8 хувь, хоол унд 7,7, ажил олох 3,7, эдийн засгийн байдал 3,4, эмнэлэг даатгал 1,1 гэж тус тус хариулсан байна.
Дээрх судалгаанаас үзэхэд анд нөхөд, хамаатан садандаа солонгос хүнтэй суухыг зөвлөнө гэж хариулсан гадаад иргэдийн ихэнх нь япон, хятад хүмүүс байжээ. Харин  эсрэгээр солонгос хүнтэй гэрлэсэн монголчуудын 50 хувь нь  нутаг нэгтнүүддээ солонгос хүнтэй суухаа боль гэж хэлдэг болж байгаа гэнэ. БНСУ-ын Хуримын товчооны Чэ Жо Чё хэмээх брокэрийн  хэлж байгаагаар Зүүн өмнөд Азийн орнуудын эмэгтэйчүүд мөнгө олох зорилгоор хуурамч гэрлэлт хийх явдал их  гэнэ.  Ийм тохиолдолд солонгос нөхөртөө зодуулан дарамтлуулсан байдалд заргалдах, заргаа авах боломж бараг үгүй . Манай солонгос бүсгүйчүүд гэрлэхээр хүн ховор боллоо гэж ярих болсон. Гадаадын бүсгүйчүүд манай оронд ирж байгаа нь баярламаар зүйл. Харин тэдэнд солонгос эмэгтэйчүүдтэй адил эрх эдлүүлэх хэрэгтэй. Ядуу буурай орны бүсгүйтэй гэрлэсэн солонгос залуусын ихэнх нь айлын ууган хүү” гэрийнхээ ажлыг өвлөж авах ёстой” , хөдөөнийхөн юмуу, эдийн засаг, оюуны чадавх дорой эрчүүд гэдэг нь харагдаж байгаа.  Солонгосчууд дотор одоо болтол Зүүн өмнөд азийнхан болон хар арьстнуудыг ад үздэг үзэл байсаар байгааг хэлэх ёстой хэмээн тэр ярьсан байна.
Сүүлийн үед манай бүсгүйчүүд гадаадыхан, тэр дундаа солонгосчуудтай гэрлэх нь ихсэж буй. Албан бус мэдээгээр өдөрт нэг монгол хүн солонгос иргэнтэй гэр бүл болж байна. Өмнөд Солонгос гэхээр л баян цатгалан, соёлтой гэж бодохоо болих цаг иржээ. Тэр тусмаа Солонгос гэдэг ганц Сөүл биш гэдгийг  ойлгож авах нь манай бүсгүйчүүдэд хэрэгтэй. Өмнөд Солонгосын уулын мухрын зэлүүд тосгонд, гуравдугаар ангийн боловсролтой солонгос залуугийн гэрт будаа тариад сууж байсан нь дээр үү, эрх чөлөөт Монгол орондоо, гэр бүлийхнийхээ дунд ажиллаж амьдарсан нь дээр үү.