ИргэнТАНАА

БНСУ-ын гадаад, дотоод улс төр , эдийн засгийн байдлыг танд сонордуулахад 

1. Сүүлийн хоёр сарын хугацаанд Умард Солонгос алсын тусгалтай пуужин хөөргөж, цөмийн хоёр дахь туршилт хийсэнтэй холбогдон тус улстай цөмийн хөтөлбөрийн асуудлаарх олон талт яриа хэлэлцээ тасалдаж, хоёр Солонгосын харилцаа хурцдан, Хойгийн байдал түгшүүртэй болж байна.

 Өнгөрсөн 5 дугаар сарын 25 өдөр хийсэн газар доорх туршилтын дэлбэрэлтийн хүч 4500TNT /рейхтрийн шаталбараар 4.4 балл/ байсан нь 2006 оны туршилтаас 5 дахин хүчтэй гэж шинжээчид тооцоолов. Умард Солонгосын тал туршилтыг цөмийн технологийг хөгжүүлэх шинжлэх ухааны ач холбогдолтой болсноос гадна тэслэлтийн болон техник, технологийн талаас аюулгүй байдал хангагдсан байсныг онцлон тэмдэглэжээ. 

 Нөгөөтэйгүүр энэ удаагийн туршилт цөмийн зэвсгийг тээвэрлэхэд тохиромжтой байдлаар овор хэмжээг багасгах, хөнөөх хүчин чадлын технологийг сайжруулахад чиглэгдсэн бөгөөд энэ нь цаашид цөмийн хошуу болгох үйлдвэрлэлийн шатанд шилжих боломжийг бүрдүүлэхэд бас нөлөөлсөн нь гарцаагүй гэнэ. Түүнчлэн АНУ-ын судлаачдын үзэж байгаагаар бол Умард Солонгост одоогоор 40 кг плутониумын нөөц байгаа бөгөөд үүгээр 10 цөмийн хошуу хийхэд хүрэлцээтэй тул тэд бага-дунд оврын цөмийн зэвсэгтэй орон болж, цөмийн хариу цохилт өгөх чадвартай байх юм байна. Энэ удаагийн цөмийн туршилтад ойролцоогоор 300 сая ам.доллар зарцуулсан гэсэн тооцоо гарч байна.

 
Умард Солонгосын цөмийн асуудлаас үүдэн ЗХА, Солонгосын Хойгт аюулгүй байдал, хүчний харьцааг эргэж хянах асуудал хөндөгдөх, АНУ, Япон, БНСУ-ын цэргийн хамтын ажиллагаа өргөжих нь зайлшгүй болж байна. Тухайлбал, тус бүс нутагт пуужингийн довтолгооноос хамгаалах системийг байршуулах, Японы өөрийгөө хамгаалах асуудал, үүнтэй холбогдон Хятадын гадаад бодлогын чиг хандлагад зарим өөрчлөлт орох төлөвтэй байна.

2. Дэлхийн санхүүгийн хямралтай холбогдуулан 2008 оны 9 сараас Санхүүгийн тогтворгүй байдлыг намжаахаар БНСУ-ын Засгийн газар эдийн засгийн хямралыг хохирол багатай гэтлэх зоримог, шийдэмгий, эрчимтэй арга хэмжээ байнга авч явуулж ирсэн нь үр дүнд хүрлээ хэмээн Олон Улсын байгууллага, эрдэмтэд, судлаачид дүгнэж байна.

2008 оны 9 сараас 2009 оны 2 сарын хооронд л гэхэд БНСУ-ын Төв банк зээлийн хүүг зоригтой, эрсдэлтэй хэдий ч 6 удаа 5.25%-аас 2.0% хүртэл бууруулсан нь зөв алхам байсан гэдэг нь нотлогдож байна.

Мөнгөний нийлүүлэлтийг нэмэгдүүлсэн нь зээлийн хүндрэлийг даван туулахад онцгой үүрэг гүйцэтгэсэн. Тухайлбал:

-       Төв банкнаас санхүүгийн чадавхийг сайжруулахад 6.5 триллион байсан хөнгөлттэй зээлийг 10 триллион хүртэл нэмэгдүүлсэн,

-       Хөрөнгийн зах зээлийн урсгалыг нэмэгдүүлэх үүднээс банкууд болон төрийн өмчит агентлагийн бонд, Засгийн газрын нэмэлт бонд, Засгийн газраас баталгаа олгосон бонд, санхүүгийн тогтвортой байдлын бонд зэргийг уян хатан болгосон,

-       Валютын солилцооны зах зээлд 12 санхүүгийн байгууллагыг нэмж оруулсан

 Банк, санхүүгийн бүтцийг шинэчилснээр санхүүгийн зах зээлийг тогтвортой болгож чадсан. Үүнд Банкийг дахин хөрөнгөжүүлэх сан байгуулсан /20 триллион вон/, Солонгосын Хөрөнгийн Менежментийн корпорациас Corporate restructuring fund хэмээх 40 триллион воны сан байгуулсан явдал нь чухал нөлөө үзүүлсэн байна.

ЖИЧ: Иргэн Мөнх болон иргэд та бүхэнд тодорхой мэдээлэл хэрэгтэй бол 
           тодорхой нэр хаягаараа манай ЭСЯ-нд хандаж болно.