Бичлэгийн тоо 372
Сонгуулиас сонгуулийн хооронд туулайчилж амьдрахыг хүсэхгүй байна. Мөрөөдлөөр дүүрэн мөрийн хөтөлбөрт мэхлүүлж, өнөөдөр биш маргаашнаас амьдрал эхлэхийг сануулах эрх баригчдад ч хууртагдмааргүй байх юм. Зүгээр л хүн шиг амьдарч, улс шиг хөгжихийг хүсэх боллоо. Эрүүл, аюулгүй орчинд боловсролтой, ажилтай орлоготой амьдрах гэсэндээ Ардчилсан намын мөрийн хөтөлбөрийг үг бүрчлэн уншиж, өгүүлбэр бүрийг нь сонжсон юм. Учир нь ардчиллын үр шимийг ард түмний нэг хэсэг хүртэж, нөгөө нь хоосон хоцрох учиргүй. Ардчилал бол хүнийг ялгадаггүй нийгмийн тогтолцоо. Ардаа алагчилдаггүй төр, түмнээ туйлдуулдаггүй Засаг төр Монголын толгойд орших учиртай юм. Нөгөөтэйгүүр, улс орны эдийн засгийн байдал олуулаа хөгжих үү, цөөхүүлээ хөлжсөөр байх уу гэдэг асуултад хариулт нэхсэн салаа зам дээр ирлээ. Үүний хариулт энэ сонгуулийн үр дүнгээр тодорхой болох юм. Үсрэнгүй хөгжлийн торгон ирмэг дээр ирсэн энэ мөчид ардчиллын партизануудын хэлж буйгаар Ардчилсан намын үнэт зүйл нь олуулаа хөгжихийг илүүд үзэж буй гэнэ. Гол нь богино хугацаанд өндөр хөгжилд хүрэх сонголтыг хийж байгаагаа ч тайлбарласан. Алт, зэсний үнэ унах болов уу гэж айдаггүй буюу ганцхан уул уурхайгаас хамааралгүй эдийн засгийг бий болгоход гол анхаарлаа чиглүүлж буй. Солонгын долоон өнгө шиг олон тулгууртай эдийн засгийг байгуулснаар 1.5 тэрбум төгрөг олж байгаа хүмүүсийнхээ орлогын албан татварыг нэг хувь болгож есөн хувийг нь буцааж өгнө гэдгээ тэд амлаж байна. Энэ тухайгаа таван хэсэгтэй мөрийн хөтөлбөртөө ч тусгасан байна билээ. Түүнчлэн халамжийг хавтгайруулан олгохын оронд шаардлагатай хэсэгт хүртээх гэнэ. Гэхдээ тэдэнд ч гэсэн дээшээ харж алгаа тоссон бэлэнчлэх сэтгэлгээг биш хоол хийх аргыг нь зааж өгөх тухайгаа хөтөлбөрт тусгасан байна билээ. Баруун төвийн намын баримталдаг нэг бодлого нь чинээлэг дундаж давхаргыг бий болгох юм. Харин зүүн төвийн нам эдийн засгийн өсөлтийг аажмаар хязгаарладгаараа ялгаатай. Иймээс хоёр жилийн хугацаанд 21 аймаг, 33 сумаар орж, 165 мянган км замыг туулан байж боловсруулсан мөрийн хөтөлбөрийнхөө цөмийг “Ажилтай, орлоготой Монгол хүн”-д чиглүүлжээ. Хүний нутагт очиж, боолчлогдох биш эх орондоо эзэн нь сууж, амьжиргааны түвшингөө баталгаажуулах нь чухал. Гэхдээ цалингаас цалингийн хооронд хоосон ходоодтой байж, хоёрдмол сэтгэлээр ажиллах учиргүй юм. Харин жишигт нийцсэн урамшууллаа авч, сэтгэл тэнэгэр амьдрахыг хүсч байна. Ингэж амьдрах баталгааг Ардчилсан нам өгч чадна гэх гэгээ мөрийн хөтөлбөрөөс нь цухалзаж байна.
Нөгөөтэйгүүр, цалин, тэтгэмжийг нийтэд зарлаж, шоу хийж, үнийн хөөрөгдлийг бий болгохгүйгээр нэмэгдүүлэх. Гол нь нэг дор бөөнөөр нь нэмэгдүүлж, ам ч үгүй хамар ч үгүй орхих бус салбар салбараар нь дэс дараатай нэмэгдүүлэхийг чухалчилжээ. Цаашлаад тэтгэврийн сангийн шинэ тогтолцоог бий болгож, зөрүүг арилгах нь зүйтэй юм. Улмаар Хүний хөгжил санг шинэчилж, уул уурхайн баялгаас орж ирж байгаа хөрөнгийн 60 хувийг суурь тэтгэвэр болон нийгмийн даатгалын санд төвлөрүүлэх гэнэ. Сайшаалтай нь, цөөн малтай малчин өрхийг дэмжиж, туслах талаар хөтөлбөрт тусгагджээ. Мал малчин хоёрыг төр зарж үздэг гэх боловч дорвитой тусламж, үйлчилгээ үзүүлж байсан нь ховор. Түүнчлэн архинд живсэн монголчуудаа аврахын тулд архины тусгай зөвшөөрлийг ганцхан Засгийн газраас олгож байхаар хуульчлах гэнэ. Энэ бол ардчилсан Ерөнхийлөгчийн санаа. Идээний дээжийг архи биш сүү гэдгийг сануулж, сэтгэлийн өргөл болсон сүүгээр хундага тулгадаг нэгэн. Баялгаараа бахархаж суугаа монголчуудад сануулахад, эрдэс баялгийн экспортыг “нэг цонх”-ны бодлогоор хэрэгжүүлэх талаар ардчиллынхан тодотгосон байна билээ. Мөн Сайншандад аж үйлдвэрийн фарк байгуулахаар ажил ид өрнөж буй. Иймд Замын-Үүд эдийн засгийн чөлөөт бүс, “Алтанбулаг” болон “Цагаан нуур” худалдааны чөлөөт бүс, Чойр ложистикийн төвийн дэд бүтцүүдийг цогцоор нь барьж байгуулна. Нефть импортлогч улс болж, импортын 100 хувь хараат байдлаас ангижрах гэнэ.
Гол нь улс шиг хөгжихийн тулд оюунлаг иргэнтэй байх шаардлагатай. Мэдлэгтэй, боловсролтой иргэдийг бэлтгэхэд тусгайлан хөтөлбөр гаргасан байхыг нь харлаа. Сургууль, цэцэрлэгийн байраар үргэлж хомсдолд орж байдаг монголчуудад олзуурхууштай хэд хэдэн санал, санаачилга байна билээ. Түүнчлэн мэргэжил бол мэдлэгт тулгуурлах учиртай. Иймээс чанартай, чанаргүй их, дээд сургуулийг “шалгалт”-нд оруулж, бүдэрснийх нь хаалгыг барина. Гол нь чанартай цөөн их, дээд сургууль байснаар мөнгө биш мэдлэг хаданд гарч, модонд авирах юм. Хэрэв бид зөв сонголт хийж чадвал амьсгалах агаартай, уух устай байж хүн шиг амьдарч, улс шиг хөгжих боломж нөхцөл байна.
Б. БАТ
www.mglclub.com Administrator
- Холбоотой бичлэг :
- http://www.mglclub.com/6232201/0a8/trackback
mmmmmmmmmmm
mmmmmmmmmmm
ㅏㅏㅏㅏㅏ