2009 онд Ерөнхийлөгчийн сонгуулийн зардал дөрвөн тэрбум төгрөг байсан
бол энэ жил 15.8 тэрбум төгрөг зарцуулагдана. Гэхдээ энэ мөнгө зөвхөн
улсын төсвөөс гарах мөнгө юм. Зардал ингэж ихээр өсөх болсон шалтгааныг
дөрвөн жилийн өмнөхөөс Монгол Улсын сонгуулийн насны хүн амын тоо өссөн,
автоматжуулсан системтэй холбоотой зардал нэмэгдсэн гэх мэтээр
албаныхан тайлбарлаад байгаа юм. Тэгвэл энэ бүхнээс шалтгаалаагүйгээр
өөр зардал хэд хэдээр нэмэгдсэн байгааг та бүхэн анзаарсан биз ээ.
Тухайлбал, Сонгуулын ерөнхий хорооны гишүүн, нам эвслийн ажилтан,
ухуулагч, нэр дэвшигч, ажиглагчийн үнэмлэх хэвлүүлэх зардал 2009-2013 он
хүртэл 5 дахин нэмэгдсэн байна. Мөн СЕХ-ны гишүүдийн ажиллах хугацааны
урамшуулал, хоолны мөнгө зэрэг нь хоёр дахин нэмэгджээ. Тодруулбал,
дөрвөн жилийн өмнөхөөс Монгол Улсын хүн амын тоо 260 орчим мянгаар
өссөнөөс болж сонгуулийн зардал тухайн үеийнхээс 187 сая 235 мянгаар
өсчээ. Харин автоматжуулсан систем хэрэглэхтэй холбоотойгоор 4 тэрбум
58 сая төгрөг нэмэгдсэн бол бусад зайлшгүй шаардлагаар өссөн зардал нь
25 сая төгрөг байгаа юм. Дээрх өсөлтүүдийг энэ удаагийн сонгуулийн
зардал өсөх болсон гол шалгаан гэж Үндэсний Аудитын газраас тайлбарлаад
байгаа юм.Тэгвэл энэ хэмжээний зардлыг батласанд зарим нэг гишүүд шүүмжлэлтэй хандаж байгаа юм.
Тухайлбал,
УИХ-ын гишүүн Ц.Нямдорж “Ерөнхийлөгчийн сонгуулийн зардал нь өмнө болж
байсан сонгуулийн зардалтай харьцуулахад 4.5 хувиар нэмэгдлээ. Санал
тоолох машиныг худалдаад аваад өгчихсөн, өдий төдий хөрөнгө зарж
шаардлагатай техник хэрэгслийг нь шийдээд өгсөн атал энэ их хэмжээний
зардлыг гаргах нь хэтэрсэн хэрэг” гэв.
Харин УИХ-ын дарга
З.Энхболд “Төрийн албан хаагч ажилласныхаа төлөө цалин авч байж, дахиад
сонгуульд ажилласан гэж давхар урамшуулал авдаг. Ингэхдээ бүр хоёрхон
хоногт 8.6 тэрбум төгрөг зарцуулах нь хэтэрсэн хэрэг. Тиймээс сонгуулийн
зардлын төлөвлөлт, гүйцэтгэл, явцад нь аудит хийх шаардлагатай” гэсэн
юм.Ямартаа ч энэ удаагийн сонгуулийн зардал ингэж ихээр өссөн байдлыг бууруулах боломжтой гэж Үндэсний аудитын газраас дүгнэснээ СЕХ-нд хүргүүлээд байгаа. Ингэхдээ “Гадаадад амьдарч байгаа иргэдийн саналыг авахад зориулж тодорхой хэмжээний зардал нэмэгдсэн байгаа. Мөн нисдэг тэрэг хөлслөх, бичиг хэрэг, унаа, СЕХ-ны шагналын болон урамшуулал, хоолны мөнгөний зардал гэх мэт зүйлд 2.4 тэрбум төгрөг хэмнэх бололцоо байгаа” хэмээн тэд дүгнэлтдээ тусгажээ.
24tsag.mn
