ШИНЭ ОНГОЦ 11.700 КМ ЗАМЫГ ТАСРАЛТГҮЙ ТУУЛЖ, ЭХ ОРОНДОО ГАЗАРДЛАА
Уншсан 14049 vote 0 2013.05.16 17:06:15
Монгол Улсад нисэх хүчин үүсэж хөгжсөний 88 жилийн ойн босгон дээр үндэсний агаарын тээвэрлэгч МИАТ компани нийт 220 зорчигчийн суудалтай, 851 км/ цаг хурдлах чадалтай цоо шинэ хөлгийг хүлээн авлаа. Хөлгийн багш нисгэгч Г.Мөнх-Очир “Би 24 дэх жилдээ нисэж байна. Урьд нь “Аэробус 310”-аар нисэж байсан. Энэхүү агаарын хөлгийн хувьд шинэ бөгөөд тоноглолын хувьд сүүлийн үеийн дэвшилтэт технологийг нэвтрүүлсэн гэдгээрээ онцлог. “Боинг 737”- той харьцуулахад том хэдий ч жолоодоход нэг их ялгаагүй байлаа. Манай улс шинэ онгоцтой болж, Монголын агаарын тээврийн түүхийн хуудас нэгээр нэмэгдэж буйд баяртай байна. Нислэгийн үед цаг агаар тогтуун байлаа. Засгийн газрын төлөөлөгчид, МИАТ, Иргэний нисэхийн ерөнхий газрынхан гээд 30 гаруй зорчигчтой ирлээ” гэв.
“Боинг 767-300ER” хөлөг нь 54.9 метр урт, 16 метр өндөр, далавч нь 47 метр урт, шатахууны багтаамж 90.770 литр, 10-20 мянган кг ачаа тээвэрлэх хүчин чадалтай, 11070 километр буулгүй нисэх боломжтой юм. Энэ үеэр цугласан зочид, төлөөлөгчид хөлгийн дотор нь орж үзэцгээв. Хэдэн арван цаг үргэлжлэх алсын зайн нислэгийн хугацаанд зорчигчдыг чилээж, уйдаахг үй байх үүднээс онгоцыг тусгай төхөөрөмжөөр тоногложээ. Тухайлбал, бизнес ангиллын 25 суудал нь 160 градус хүртэл налдаг, суудал бүрийн урд байрлах дэлгэцээр монгол, гадаад кино, телевизийн хөтөлбөрүүдээс сонголт хийн үзэх, дэлхийн хөгжмийн зохиолчдын алдарт бүтээлүүдээс сонсох боломжтой. Мөн нислэгийн үед USB болон цахилгааны залгуур ашиглан нөүтбүүк, гар утсаа цэнэглэх орчин үеийн технологийг ашиглажээ.
Ерөнхийлөгч Ц.Элбэгдорж 2011 онд АНУ-д хийсэн айлчлалынхаа үеэр МИАТ компанид гурван шинэ онгоц худалдан авах тухай гэрээг “Боинг” корпорацтай байгуулсан аж. Сүүлийн үеийн технологиор үйлдвэрлэсэн 114 сая ам.долларын өртөг бүхий тус хөлгийн санхүүжилтийг бондын хөрөнгөөс гаргаж байгаа бөгөөд МИАТ компани 10 жилийн хугацаанд эргэн төлөх нөхцөлөөр гэрээ байгуулжээ. Цаашлаад “Боинг 767-800” загварын арай жижиг хоёр онгоцыг 2016 оны нэг, хоёрдугаар улиралд багтаан авах төлөвлөгөөтэй байгаа бөгөөд мөн оноос АНУ руу шууд нислэг үйлдэх боломж бүрдэх гэнэ.
МИАТ шинэ онгоцтой болсонтой холбоотойгоор одоогийн байгаа нислэгийн тоог нэмэгдүүлж, шинээр холын нислэгийн маршрут нээхээр зарим оронтой идэвхтэй яриа өрнүүлж байгаа тухай МИАТ-ын гүйцэтгэх захирал Г.Жаргалсайхан ярив. Түүнчлэн дотоод, гадаадын бүх нислэгийн тийзийн үнэ ойрын хугацаанд тодорхой хувиар нэмэгдэх тухай мэдээллийг албаныхан хэллээ. “Боинг 767” анхны нислэгээ энэ сарын 25-нд БНСУ-ын нийслэл Сөүл хот руу хийх юм.
