Герман улсын Мюнхен хотноо найм дахь өдрөө үргэлжилж буй буудлагын спортын дэлхийн аварга шалгаруулах 50 дахь удаагийн тэмцээний залуучуудын хийн гар бууны 10 м-ийн дасгалд 78 тамирчин онч мэргээ сорьсноос манай Ц.Хонгорзул 383 оноогоор түрүүлж, Монгол Улсын түүхэнд дэлхийн залуучуудын анхны аварга болов.
Мөнгө, хүрэл медалийг Г.Аллиссон (Франц 381 оноо), Ким Е-Жи (БНСУ 380) нар хүртсэн бол Монголын хоёр дахь тамирчин Д.Энхзул 365 онож, 53 дугаар байр эзэлжээ.
Энэ жил 20 настай, ХААИС-ийн оюутан, залуу аварга маань урьд нь БНХАУ-ын Наньжин хотноо болсон Азийн аварга шалгаруулах залуучуудын тэмцээнээс багаараа медаль хүртэж байсан удаатай.
Дашрамд дурдахад, түүний эцэг Л.Цагаандалай нь МҮОНТ-ийн уран бүтээлийн IV нэгдлийн сэтгүүлч-редактор бөгөөд хурдан морь, үндэсний сурын чиглэлээр олны танил болсон спортын тайлбарлагч юм.
