Хаан банкны гүйцэтгэх захирал Питер Морроу Төлөөлөн удирдах зөвлөлөөс томилогдсон шинэ захирал Саймон Моррист өчигдөр халаагаа өгөв. Монголчуудын эрхэмлэдэг морин цагт тус банкнаас зарласан хэвлэлийн бага хурлын үеэр энэ тухай албан ёсоор мэдэгдлээ.

Одоогоос арван жилийн өмнө алдагдалтай ажиллаж байсан, нийт актив нь 50-хан тэрбум төгрөгт хэлбэлзэж байсан банкийг өдгөө нийт активыг нь 1.4 их наяд хүргэж, ашиг орлогын хэмжээг өсгөж чадсан гавьяаг ТУЗ нь үнэлж байгаагаа илэрхийлэв.

Хаан банкны ТУЗ-ийн дарга Хидео Савада “Өнгөрсөн хугацаанд энэ банкны төлөө хийж гүйцэтгэсэн бүхэнд нь Питер Морроуд талархал илэрхийлье” гээд ”Шинээр томилогдож буй Саймон Моррис нь олон улсын менежмент, санхүүгийн салбарт ихээхэн туршлага хуримтлуулсан банкир тул бидний өнөөгийн амжилтыг ахиулж, хөгжлийн дараагийн шатанд гаргах туршлагатай хэмээн үзэж өндөр шалгуураар сонгож авсан” гэж ярилаа.

Саймон Моррис нь Англи улсын иргэн бөгөөд Хенлигийн Бизнесийн их сургуулийг төгссөн, бизнесийн удирдлагын магистр зэрэгтэй аж. Олон улсын Стандарт Чартеред банкны Ази, Европ, Африкийн салбаруудад 25 жил гүйцэтгэх албан тушаал хашжээ. Мөн Ази, Африк тивийн олон оронд санхүү болон хөгжлийн асуудлаар зөвлөхөөр ажиллаж байсан нэгэн аж. Хамгийн сүүлд Шри Ланк улсын Стандарт Чартеред банкны гүйцэтгэх захирлаар ажиллаж байгаад Хаан банкны гүйцэтгэх захирлаар томилогдож буй гэнэ.

Монголын тухай түүний сэтгэгдэл болоод цаашид хийх ажлын тухай асуусан сэтгүүлчийн асуултад “Монголд ирээд гурав хонож байгаа тул бодит байдалтай танилцах судалгаа хийх ажлаа нэгдүгээрт тавьж байна. Та бүхний асуултад хариулах боломжгүй бол битгий гайхаарай” гэж эелдгээр хариулсан юм. Энд ажиллах санал ирсэн үеэс л Монголын тухай мэдээллийг интернэтээс авчээ. “Гэхдээ Монголын тухай мэдээлэл хангалттай бус байсан тул дэлхийд танигдаж амжаагүй улс гэж ойлгосон” гэв. Тэрбээр “Монголын тухай мэдээлэл авах тусам сонирхолтой байсан, Монголыг дэлхий нийт сонирхох тэр үед байгаа юм уу даа гэж бодогдсон” гэж онцоллоо.

Мөн Саймон Моррис “Монгол орон болон Хаан банкны хувьд өсөлт хөгжлийн зөв цэгтээ байна гэж би бодож байна. Мэдээж харилцагчдынхаа тус дэмжлэгээр ийм түвшинд хүрсэн. Энэ нөхцөл нь цаашид сайн ажиллах үндэс болох нь тодорхой юм. Бид олон улсын түвшинд хүрсэн үйлчилгээг үзүүлж ажиллах болно” гэж мэдэгдэв.

Тус банкны Удирдах зөвл ө лөөс Саймоныг тогтвортой, удаан хугацаагаар ажиллуулах сонир холтой ч одоогоор гурван жилийн хугацаагаар гэрээгээ хийсэн байна.

Олон улсад хүлээн зөвшөөрөгдсөн байгууллагад ажиллаж байсан хүнийг Хаан банкны гүйцэтгэх захирлаар сонгоно гэсэн төлөвлөгөөгөө амжилттай гүйцэтгэсэн тухайгаа хуучин захирал Питер хэлээд цаашид Монголын хөрөнгийн бирж болон соёл урлагийг хөгжүүлэх чиглэлээр өөрийн зүгээс боломжтой бүхнээ хийхээ энэ үеэр мэдэгдэв. Тэрбээр Хаан банкнаас яваагүй, Монголоос ч явахгүй хэмээгээд банкны зөвлөхөөр хоёр жилийн хугацаатай ажиллах болсон тухайгаа нэмж хэллээ.

Япончууд 53 хувь, америкчууд 2.6 хувь, монголчууд 35.3 хувь, Олон улсын санхүү- гийн корпораци 9.1 хувийг эзэмшдэг Хаан банкны гүйцэтгэх захирлаар энэ удаад Английн иргэн томилогдсон нь хувь хүний шалгуурыг эхэнд тавьсан бололтой.

www.mongolnews.mn - Эх нутгийн чимээ