Энэ жилийн хоёрдугаар сард зодог тайлсан их аварга Асашёорюү Монголын тулааны урлагийн тамирчдыг дэмжихээр “Асашёорюү” нэртэй баг байгуулаад анхныхаа тулаанд орлоо. Түүний сонгосон тамирчин нь “Монголын тулааны урлагийн хаан” гэж болохоор кёкүшин каратэгийн тамирчин Ж.Нарантунгалаг юм. Дунд жингийн дэлхийн аварга шалгаруулах тэмцээнд Монголоо төлөөлсөн түүний өрсөлдөгч Японы хашир мастер, Америкийн рингэнд зодолдож явсан Гооно Акихиро.
Тэмцээн Сүмогийн ордонд болсон бөгөөд сэтгүүлчид их аваргыг тэсэж ядан хүлээсэн ч Асашёорюү бараагаа харуулсангүй. Тоглолт прайд буюу манайхны нэрлэж заншсанаар дүрэмгүй зодооны журмаар гурван үеэр тав таван минутаар явагдлаа. Ж.Нарантунгалаг анхнаасаа каратэгийн тамирчин ч Монголд болсон прайд тэмцээнд ялагдаж үзээгүй. Харин түүний өрсөлдөгч Гооно кик бокс, байлдааны самбогоор хичээллэн, 55 тоглолтод оролцсон туршлагатай дайчин. Тулааны эхний үеэс л Тунгаа Гооногоос давуу байгаа нь ажиглагдлаа.
Гооно барилцаж авахаас зайлсхийн, зайгаа барин ринг тойрч байсан бол Тунгаа үндэсний бөхийн мэх хэрэглэн байн байн унагаасаар. Нэгдүгээр үеийн сүүлд рингийн буланд шахан довтолсон боловч харамсалтай нь цаг дуусаж, хүнд цохилтод оруулах боломж гарсангүй. Хоёрдугаар үед Гооно бага зэрэг сэргэн манай тамирчныг хоёр удаа хүнд байдалд оруулж чадсан ч Ж.Нарантунгалаг сөрөг довтолгоон хийж, хүнд байдлаас гарч чадсан. Гэхдээ өрсөлдөгчийнхөө бүсэлхийнээс доош цохисон учир торгуулчихав. Ж.Нарантунгалаг сэрвүү барьцнаас мушгин унагааж, дээр нь гарч, нүүр нүдгүй балбаж эхэлсэн ч бас л цаг дуусаж, япон тамирчин аврагдлаа.
Сүүлийн үед ч Тунгаа дайран, Гооно хамгаалсаар дууссан эл тоглолтод манай тамирчин илт давуу байдлаар ялсан юм. Шүүгч нар 30-28, 30-29, 30-28 оноогоор манай тамирчинд ялалт өгөв. “Асашёорюү” баг арлын орны тулааны ертөнцийг орвонгоор нь буулгахын эхлэл ийнхүү тавигдлаа. Тэмцээний дараа Тунгаа хэвлэлийн бага хурал хийлгэснийг сонирхуулъя.
-Тэмцээн ямар болов? Өрсөлдөгч чинь хэр байв?
-Ялсандаа маш баяртай байна. Гооно сайн тамирчин. Магадгүй жин хассан нь нөлөөлсөн байж болох. Ямар ч гэсэн өнөөдөр би илүү байлаа.
-Нууц тактик бэлдсэн тухай та ярьж байсан. Тактик ёсоороо тоглож чадав уу?
-Чадсан. Кикбоксын тактикийг монгол бөхийн мэхтэй хослуулах болон ойрын зайнаас тоглохоор тактик боловсруулснаа гүйцэтгэж чадсан. -Асашёорюү зөвлөгөө өгсөн үү? -Их аварга сэтгэл зүйн зөвлөгөө их өгсөн. “Өөрийгөө дийлж, өрсөлдөгчөө ялна” хэмээн захиж байлаа. Оноогоор илүү байгаадаа сэтгэл амралгүй, болгоомжтой тоглоход аваргын захиас их хэрэг болсон.
-Асашёорюүтэй утсаар ярив уу?
-Дөнгөж сая утасдаж, баяр хүргэлээ.
-Өөр юм яриагүй хэрэг үү?
-“Маргааш Японд очно. Уулзана биз дээ” гэж асуусан. Гэхдээ би маргааш Монгол руу харих болохоор уулзаж амжихгүйгээ дуулгаж, дараа учрахын ерөөл тавьсан.
-“Асашёорюү” багийн анхны тамирчны үүргийг нэр төртэй биелүүллээ.
-Тиймээ, баяртай байна. Гурван жил япон багштай хичээллэсний хэрэг гарсан. Дараагийн тоглолт шийдэгдээгүй байгаа ч тулалдахад хэзээд бэлхэн байна.
-Өнөөдөр та их сонин мэхнүүд хэрэглэж байлаа.
-Дандаа монгол бөхийн мэхнүүд.
-Цаашдаа танай багаас ямар тамирчид оролцох бол оо?
-Манайд хүчтэй сайн залуу олон бий. Хэн ч бай ялалтын төлөө л үзэлцэх болно.
