БНХАУ он гарсаар БНСУ-ын Засгийн газрын бондод оруулсан хөрөнгийн хэмжээгээ хоёр дахин нэмэгдүүлсэн байгааг “Bloomberg” мэдээлэв. Эдүгээ урд хөрш тус улсын нийт 3.4 тэрбум долларын өрийн бичгийг эзэмшиж буй аж. АНУ-ын Засгийн газрын бондыг зарж олсон орлогынхоо нэлээд хэсгийг хятадууд ийнхүү солонгосчуудад зээл өгөхөд зарцуулжээ.
Сүүлийн нэг жилийн хугацаанд БНХАУ Америкийн нийт 72 тэрбум долларын
өрийн бичгийг зарсан байна. Өнгөрсөн долдугаар сарын байдлаар Хятад улс
АНУ-ын 843.7 тэрбум долларын өрийн бичгийг эзэмшиж байгаа нь сүүлийн 1.5
жилийн доод үзүүлэлт юм.
БНСУ-ын Засгийн газрын өрийн бичиг нь эдүгээ 2.45 их наяд долларт хүрч буй Хятадын гадаад валютын нөөцийн ердөө 0.13 хувийг бүрдүүлж байгааг “Bloomberg” онцлоод, он дуустал энэ хэмжээ өсөх хандлагатайг тэмдэглэжээ.
Тус улсын Засгийн газрын өрийн бичиг өндөр хүүтэй учир хөрөнгө оруулснаар ашиг их олно. Гэтэл Америкийн өр тэнгэрт хадаж буй атал бондын хүү нь бага байгаа аж.
