Оюутан, сурагчдыг нэгэн талбайд нэгтгэж хичээлийн анхны үдшийн дурсамж үлдээдэг “Хичээлийн дараа” шоу тоглолт гурав дахь жилдээ зохион байгуулагдаж байна. Энэ шоуг “Харанга” хамтлагийн гишүүн Ц.Чулуунбатын “UP music” продакшн зохион байгуулдаг.
Түүнчлэн энэ сарын 22-нд тус хамтлагийнхан БНСУ-д ажиллаж байгаа монголчуудтайгаа уран бүтээлээрээ золгон мэндчилэх гэж байгаа. Түүнтэй утсаар холбогдож энэ талаар тодрууллаа.
-Сайн байна уу, “Өнөөдөр”-ийн “Утасны анд” байна. Та яг одоо хаана, ямар ажил амжуулаад явж байна вэ?
-“Хичээлийн дараа” шоу тоглолтын хамгаалалтын талаар ярилцаж, тохирчихоод “Шангрилла”-гийн урдуур өнгөрч явна.
-Энэ жил хичээлийнхээ дараа хэний дууг сонсох боломжтой вэ?
-Орчин үеийн залуусын сонсох дуртай хамтлаг, дуучдыг бүгдийг нь сонсгох болно. Залуусын ертөнц биднийхээс маш их ялгаатай. Тэдний сонсох хөгжим ч бидэнтэй адилгүй. Өмнөх жилүүдэд оролцож байсан хуучин ангийнхнаас гадна “Universe best songs” наадмын шилдэг оролцогчид, “Моханик”, “Пипс” зэрэг хамтлаг, Б.Эгшиглэн, Цэлмүүн нарын залуу дуучид оролцоно.
Тоглолтод дуучин С.Наран урилгаар оролцож байгаа. Түүнээс гадна манай тоглолтыг АПУ, “Мөнхийн үсэг” компани хамтран зохион байгуулж, залуусын ундаагаар “Фрутта” жүүс сонгогдоод байна. Тоглолтын ерөнхий найруулагчаар “Up music”продакшны Х.Халиун ажиллаж байгаа.
-“Хичээлийн дараа”-гийн дараа “Харанга”-ынхан БНСУ-ыг зорих гэж байгаа гэсэн үү?
-Манай хамтлагийн 20 жилийн ойн аялан тоглолтыг зохион байгуулахад хамтран ажилласан “Хаан” банкны урилгаар БНСУ-д ажиллаж амьдарч байгаа монголчууддаа “Харанга” хамтлаг, гавьяат жүжигчин Б.Сарантуяагийн хамт ая дуугаа өргөх гэж байгаа юм. Олон хүн багтаах тоглолтын том танхим сонгосон байгаа. Энэ сарын 22-нд Сөүлд тоглолтоо үнэ төлбөргүй хүргэх юм.
-Тоглолтын тасалбарыг 30 мянган воноор худалдаалж байгаа гэсэн ташаа мэдээлэл гарсан байсан.
-“Хаан” банк зохион байгуулж байгаа шүү дээ. Монголчууддаа бэлэг барьж байгаа юм. Тэгээд ч ер нь “Харанга”-ынхан 20 жилийн ойн тоглолтоосоо эхлээд үнэгүй тоглодог моодтой болоод байгаа шүү дээ.
-Та бүхний уран бүтээлд амжилт хүсье.
-Баярлалаа. “Харанга”-ынхан тун удахгүй шинэ уран бүтээлийн бэлтгэлдээ орох гэж байгаа. Цаашдаа ч үзэгчидтэйгээ хамт байсаар байх болно.
www.mongolnews.mn - Эх нутгийн чимээ