Forex зах зээлд оролцогчид америк доллараас зугтах хандлага сүүлийн үед бий болж буй. Гэтэл Японы Төвбанк интервенц хийснээс болж иенийн ханш суларч, уг валют мөн л хөрөнгө оруулагчдын сонирхлыг татахаа байв.
Тиймээс тоглогчид эрсдэл ихтэй ч евро болон фунт авч эхэлснийг РБК агентлаг мэдээлжээ. Энэ нь мэдээж евро, фунтийн ханшид эергээр нөлөөлж эхэлсэн байна. Нэг евро 1.3 доллараас ялимгүй өндөр үнээр арилжаалагдаж байгаа нь сүүлийн нэг сарын дээд үзүүлэлт болсон юм. АНУ-ын макро эдийн засгийн үзүүлэлтүүд муу гарч байгаа нь хөрөнгө оруулагчдыг айлгах нэг шалтгаан аж.
Үүний зэрэгцээ Холбооны нөөцийн банк энэ сарын 21-нд хямралын эсрэг шинэ арга хэмжээ авах гэж байгаагаа зарлана хэмээн шинжээчид хүлээж байна. Өмнөх санхүүжилт эргэж төлөгдөөгүй, Америкийн банкуудын “хар дансанд” үлдсэн байхад шүү дээ. АНУ-ын Төвбанк шинээр мөнгө үйлдвэрлэж, банкууддаа өгөхөөс л хөрөнгө оруулагчид айж байгааг мэргэжилтнүүд онцолжээ.
