Ерөнхийлөгч, УИХ-ын дарга, Ерөнхий сайд нар эгэл түмэн нь замын хөдөлгөөнд оролцох гэж хэрхэн зовдогийг мэдэхгүй. Тэднийг хөдөлгөөнд оролцох болохоор явах замыг нь 30 минутын өмнө чөлөөлчихдөг тул зам зогсоол болсныг мэдэхгүй байх нь ч аргагүй юм. Төрийн өндөрлөгүүд явах гэж байгаа хэмээн замын цагдаа нар хөдөлгөөн зогсоосноор өнөөх түгжрэл бүр ч гаардаг, иргэд ч бухимддаг.
Тэгвэл Ерөнхийлөгч маань ард түмэнтэйгээ ойр байх амлалтаа замын түгжрэлийг ашиглаж хэрэгжүүлэхээр шийдэв бололтой. Хөдөлгөөн зогсоодог журмыг өөрчлөхийг хүсчээ. Түүний Тамгын газрын дарга Д.Баттулга өчигдөр Замын цагдаагийн газрын дарга, хурандаа Х.Энхжаргал болон Төрийн тусгай хамгаалалтын газрын дарга, хурандаа Л.Батзориг нарыг хүлээн авч уулзахдаа дээрх байр суурийг нь танилцуулав. Мэдээж УИХын дарга, Ерөнхий сайдын байр суурийг сонсохоо ч хэлжээ.
Мөн боломжтой бол энэ сарын 20-ноос шинэ зохицуулалт хийж, цаашид Төрийн гурван өндөрлөгийг замын хөдөлгөөнд оролцох үеэр иргэдийг удаан хугацаанд гацааж, замын түгжрэл үүсгэхгүй байх талаар анхаарч ажиллахыг хүссэн байна. Монгол Улсын Ерөнхийлөгчийн ард түмнээ хүндэтгэсэн энэ шийдвэрт баяртай байгаагаа ЗЦГ-ын дарга, хурандаа Х.Энхжаргал илэрхийлээд “Та бүхний санаачилгыг дэмжиж байна.
Бид хуулиараа төрийн өндөрлөгүүдийн аюулгүй зорчих нөхцөлийг хангах үүрэгтэй. Ерөнхийлөгч, УИХ-ын дарга, Ерөнхий сайдыг зорчих үед сөрөг урсгалыг нь хэвийн явуулж байх боломжтой” гэсэн хариу өгчээ.