10-4-дүгээр сард магни ихээр алдагддаг
Энэ удаагийнхаа булангаар бүсгүйчүүдийн эрүүл мэнд, гоо сайханд тустай зарим зөвлөгөөг хүргэе.
Ямар ч гоо сайхны бүтээгдэхүүн бүсгүй хүнийг гялалзсан тунгалаг харц, туяа татсан амьд эрүүл байдлаар гоёж чадахгүй. Яагаад гэвэл эмэгтэй хүн эрүүл байхад ямар ч бүтээгдэхүүн хэрэглэснээс илүү тунгалаг царайтай, гоо сайхан харагддаг байна. Өнөөгийн амьдралд бүсгүйчүүд гэр орон, үр хүүхэд, хань нөхрийнхөө төлөө зүтгэсээр байгаад дахин олдохгүй үнэт эрдэнэ болсон эрүүл мэндээ хайрлаж гамнах хэрэгтэйг мартчихдаг.

Мөн бүсгүйчүүд маань эмэгтэй хүний бие махбодид ямар бодис онцгой чухал шаардлагатай байдгийг тэр бүр мэддэггүй. Эрдэмтдийн үзэж байгаагаар магни бол эмэгтэй хүний биед хэрэгтэй хамгийн чухал эрдэс аж. Эмэгтэй хүний бие махбод магнийн дутагдалд орвол эрүүл мэндэд онцгой муу нөлөө үзүүлдэг гэнэ. Ялангуяа хэвийн жирэмслэлт, тээлт, төрөлт, тогтмол зовиургүй сарын тэмдэг зэрэгт сөргөөр нөлөөлдөг байна. Сарын тэмдэгийн үед эмэгтэй хүний биед магнийн хэмжээ эрс багасдаг байна. ПМС буюу сарын тэмдгийн өмнөх хямралтай холбоотой уурлах, бухимдах, ядрах, биеийн  жин хэлбэлзэх зэрэг нь бие махбод дахь магнийн хэмжээ багассантай холбоотой аж.
Жирэмсэн үед магни дутагдвал хүүхэд бага  жинтэй, дутуу төрөхөд хүргэдэг байна. Мөн жирэмслэлтээс хамгаалах дааврын эм ууж байх үедээ магни хэрэглэвэл тустай аж. Магни нь уураг, нүүрс ус, өөх тосны солилцоо, ясны уян хатан, бөх бат байдал, бие махбодод кальцийг шингээхэд тун чухал үүрэг гүйцэтгэдэг аж. Аливаа стресс, ядаргаа, ажлын ачаалал, буруу хооллолт зэрэг  нь хүний биед магни дутагдах гол нөхцөлийг бүрдүүлдэг гэнэ. Хүний биед хоногт 300-350мг магни шаардлагатай байдаг аж. Тэгвэл бид өдөрт  хоол хүнсээрээ дамжуулан ердөө л 175мл орчим магни авч чаддаг байна. Өөрөөр хэлбэл хэвийн хэмжээнээс хоёр дахин бага магни авч байна гэсэн үг. Цагаан будаа, цагаан талх, нарийн боов зэрэгт магни бараг агуулагддаггүй аж. Мөн кока-колад агуулагддаг ортофосфорын хүчил, янз бүрийн консервантууд, архи тамхи зэрэг нь магнийг хүний биеэс их хэмжээгээр алдагдуулдаг аж.
Бүсгүй та өөрийнхөө биед магни дутагдсан эсэхийг шалгаарай. Энэ нь тун хялбар. Хэрэв танд дараах шинж тэмдгүүд илэрч байгаа бол магни  дутагджээ гэж ойлгож болно.
-Стресст байнга орох
-Уурлаж уцаарлах
-Сэтгэл тогтворгүйжиж, амархан баярлаж гомдох, эмзэглэх
-Шөнө шөрмөс татах, хөлийн эрээн булчин зангирах
-Хоолойд юм тээглээд байх шиг зовиуртай болох
-Амархан эцэж ядрах
-Нойронд  муу болох
-Толгой байнга өвдөх
-Зүрх дэлсэн, цохилт ихсэх
-Биеийн эсэргүүцэл суларч, амархан өвдөх
-Бээрэг болох, үргэлж даарах гэх мэт шинж тэмдэг илэрдэг байна.
Дашрамд дурдахад арваас дөрвөн сар хүртэл магнийн уналт үргэлжилдэг байна. Тодруулбал  энэ үед хүний бие  дэх магнийн түвшин буурдаг. Өөрөөр хэлбэл магни ихээр алдагддаг байна. Энэ үед магнийн комплекс уух хэрэгтэй. Ердийн витамины комплекст магни  маш бага хэмжээгээр агуулагддаг аж. Магнийн био органик давснууд нь ходоод гэдсэнд харшилдаггүй бөгөөд биед амархан шингэж, магнийн түвшинг хэвийн хэмжээнд нь барьж чаддаг гэнэ.
Ингэснээр сарын тэмдгийн өмнөх болон ирэх үеийн зовиураас ангижруулж ядрах, хөлрөх, даралт тогтворгүй болох зэрэг хямралыг зогсоож, зүрх судасны үйл ажиллагааг эрчимжүүлдэг байна. Тиймээс эрүүл мэнддээ анхаарал хандуулж биед шаардлагатай аминдэм, эрдэс бодисыг тогтмол хэрэглэж байвал эрүүл гоо сайхныг бий болгож чаддаг байна.

Бүсгүйчүүдэд хүргэх энгийн зөвлөгөө
Таны хэрэглэж байгаа крем, тень, хумсны лак зэрэг чинь хэрэглэж эхэлснээс хойш бараг жил болчихсон байна уу. Бүсгүйчүүд гоо сайхны бүтгээгдэхүүн хэрэглэх талаар баялаг туршлагатай ч хадгалах зарчмыг нь  мөрдөж төдий л чаддаггүй.
Эмэгтэй хүний хувьд гоо сайхан байна гэдэг чухал зүйл. Энэ чухал зүйлээ хуучирч  муудсан гоо сайхны бүтээгдэхүүнээр бүү хордуулаарай. Юуны өмнө гоо сайхны бүтээгдэхүүнээ нарны хурц тусгал, хэт халуун болон хүйтэн орчин, чийгнээс хамгаалах хэрэгтэй. Үүнийг анхаараагүйгээс таны өчнөөн үнэтэй косметик ч ямар ч үр дүн өгөхгүй харин ч хор учруулж болох юм.

Крем
Хэрэв та олон төрлийн крем хэрэглэдэг бол эдгээр чинь онгойлгосноос хойш нэлээн удаан хэрэглэж байгаа нь лавтай. Кремийн найрлага нь усан суурьтай бол нэг жил, тосон суурьтай бол 1.5 жил хадгалж болно. Үүнээс илүү хугацаагаар хадгалсан бол шууд л хогийн сав руугаа хийх хэрэгтэй. Ямар ч фирмийн хэчнээн үнэтэй авсан ч харамсах хэрэггүй. Мөн та крем түрхдэг зөөлөвч, порлоноо тогтмол угааж цэвэрлэн, сольж байх хэрэгтэйг санаарай.

Тэжээлийн тос
Тэжээлийн  тосоо сонгохдоо хугацааг нь харж, шалгаж аваад хугацаанд нь хэрэглэж дуусгах хэрэгтэй. Тосыг хөргөгчинд хадгалахаас татгалзаарай. Мөн гараар бус тусгай савх, жижиг халбагаар таслан авч хэрэглэвэл чанарт нь нөлөөлдөггүй байна.

Уруулын будаг
Түрхэх дуртай уруулын будаг чинь үнэр нь өөрчлөгдөж, өтгөвтөр эсвэл шингэн болж, бүтэц нь өөрчлөгдсөн бол шууд л хаях хэрэгтэй. Удсан будаг таны дотор эрхтэнд сөргөөр нөлөөлнө шүү. 

Нүдний тень, харандаа
 Тень хугацаагүй, мууддаггүй гэж ойлгож болохгүй. Тенийг 1-1.5 жил хэрэглэж болдог. Харин харандааг бол дуустал нь хэрэглээрэй. Сормуусны будаг маш богино настай. Онгойлгосноос хойш 3-10 сарын дараа шинээр солих хэрэгтэй.

Хумсны лак
Магадгүй удаж хуучирсан хумсны лак нэг их аюул учруулахгүй байх гэж та  бодож болох юм. Хатаж хуучирсан өтгөрсөн, бөөгнөрсөн лакны ач тус гэж байдаггүй байна. Хуучирсан лак мэдээж тогтоц муутай, хумсанд жигд түрхэгддэггүй гэх мэтээр хумсыг огтхон ч сайхан харагдуулахгүй нь мэдээж. Лакыг онгойлгосноос хойш зургаан сараас илүү хадгалах хэрэггүй.

Д.ОРХОН