Энд би нэгэнт эр хүний зүгээс бичиж чадахгүй учраас зүгээр л өөрийнхөө ажиглаж мэдсэнээ, мөн өөрийнхөө туршлагаас ярья. Залуучууд цааш нь үргэлжлүүлнэ биз, хэрвээ хүсвэл…

1. Бүсгүй та хэзээд байгаагаараа л байж сур.

Эрчүүд аальгүй, худлаа маягтай бүсгүйд маш дургүй. Намайг жоохон байхад л миний том ахаас ийм зан илт мэдрэгддэг байсан. Хажуугийн орцны нэг аймаар аальгүй эгчийг манай гэрт орж ирээд ээжтэй юм ярьж байхад нь “ороо нь орсон муужгай шиг сэжгийн амьтан бэ” гэж аймаар дургүйцэж хэлэхийг нь сонсоод тухайн үед энэ үгийн учрыг ойлгоогүй ч би огт мартаагүй, ямар учиртай тэгж хэлсэн юм бол гээд л гайхаад байдаг байлаа. Тэр эгч аягүй наалинхай дуутай, маяг нь дэндсэн, хөдөлж ядсан юм байсан. Надаа одоо болтол энэ үг нь мартагддаггүй юмаа. Муухай үг. Гэхдээ л эмэгтэй хүнд илүү дутуу худлаа маяг хэрэггүй гэдэг ойлголтыг хэзээ ч анинстол хийх боломжгүйгээр миний толгойд суулгачихсан үг. Сүүлд найз залуучуудаасаа ч аальгүй маягтай бүсгүйчүүдэд дургүй байдгийг нь би ажигласан. Бүсгүй хүн даруухан байж болно, сэргэлэн галзуу байж болно, хөгжилтэй, цоглог байж болно, ааштай байж болно, ямар ч тохиолдолд өөрийнхөө зангаар л байх хэрэгтэй. Хуурамч баг хэрэггүй.

2. Бага зэрэг эрх зан байхад гэмгүй.

Хайртай залуудаа бол эрхэлдэг байх хэрэгтэй. Таньдаг бүх залуудаа эрхлээд байвал тэрэн шиг тэнэг юм байхгүй шүү. Зөвхөн найз залуудаа аан. Үнэнээсээ хайртай залуугаа харахаар өөрийн эрхгүй л эрх зан хөдөлдөг дөө угаасаа. Эрхлэхээр тэд нар дуртай байдаг. Гэнэн, тэнэгдүү ч юм шиг, эрх танхил зан гаргаж байгаад л эрчүүдийг хөөрхөн аргалчихаж болдог. Тэд нар чинь хад чулуу мэт сүрлэг гэж онгирох боловч цагаа тулахаар бас л хайлсан тугалга шиг хүмүүс шүү дээ.

3. Ээж шиг нь халамжтай бай.

Ямар ч эр хүн халамжтай эмэгтэйд дуртай. Яагаад гэвэл бүгдээрээ ээжтэй учраас. Ээж шигээ халамжтай бүсгүйд бол нугасгүй. Тэгш эрх мэрх гэж ярьж битгий тэнэгт. Хамт байгаа тохиолдолд боломжоороо халамжил. Автомат гэр ахуйн бараа элбэг болчихсон өнөө үед сайхан хоол хийж өгөөд, хувцас хунарыг нь угааж, индүүдээд өгөхөд нээх ядаад байх юм байхгүй. Тэд нар чинь цагаа тулахаар их эмзэг, турьхан хүмүүс. Хөргөгч дүүрэн талх, хиам үлдээгээд орхиод явсан ч хоолшихгүй. Заавал гарын хоол идэж байж сая нэг юм хоол идсэн болдог сонин бүтэцтэй хүмүүс. Хоол хийх материалыг нь хөргөгчөөр дүүрэн бэлдээд орхисон ч хэн нэгэн хөргөгчийг нь үүрээд явчихсан юм шиг аяга хоол хийгээд идчихэж чадахгүй залхуураад сууж байхаасаа ч сийхгүй нөхөд. Тийм болохоор хамт байгаа үедээ хүүхдээ бөөцийлж байгаа юм шиг халамжлахад гэмгүй.

4. Өөрийгөө эр хүнээс илүү ухаантай гэж хэзээ ч битгий бод.

Яана даа гэмээр хоосон толгойтой залуучууд бол одоо зөндөө. Гэхдээ найз залуу чинь мэдлэг нимгэн, жоохон тэнэгдүү бол хажууд нь хэзээ ч тэр чинь тийм байдаг, чи ийм юм мэдэхгүй байхдаа яадгийн гэж маргалдаж болохгүй. Өөрийгөө түүнээс илүү ухаантай гэж дотроо бодож болох хэдий ч ил гаргаж хэлж хэзээ ч болохгүй. Ялангуяа найз нарынх нь хажууд. Залуучууд өөрөөсөө илүү юм мэддэг бүсгүйд дургүй байдаг учраас энэ байдалд нь бүү анхаарлаа хандуул. Хэрвээ бүсгүй минь ийм залууд сэтгэл алдарсан бол дуугай л тэвч, үгүй бол хэрүүл маргаан үүсгэлгүйгээр хөнгөхөөн холдож сур.

Үнэхээр ухаалаг залуутай учирсан бол өөрийгөө азтайд тооцож, тэр залуугаа алдахгүйг хичээ.

5. Эр хүний бие даасан байдалд битгий халд

Эр хүний шийдэж чадах асуудалд хэзээ ч битгий хошуу дүр. Түүнд битгий саад бол. Шаардлагатай тохиолдолд найз залуу чинь, нөхөр чинь чамаас тусламж хүсвэл өөрийн саналаа хэлж болох юм. Найз бүсгүйдээ, эхнэртээ толгойгоо мэдүүлсэн эрчүүд хамгийн хөгийн, арчаагүй харагддаг. Тэднийг хэзээ ч ийм байдалд битгий оруул. Эр хүний шийдвэрийг хүндэлж сур, үнэхээр буруу шийдвэр гаргаад байгаа нь илт байвал уурлаж, уцаарлаж, загналгүйгээр учирлаад ярилцаад үзэхэд гэмгүй. Ухаалаг залуучууд бол эргэцүүлж бодно, хүлээж авна. Ухаан муутай нь муйхарлана, өөрийнхөөрөө зүтгэнэ. Тийм тэнэгүүдээс аятайхан холдохыг бодсон ч яахав.

6. Үргэлж сонирхолтой байхыг хичээ.

Монгол бүсгүйчүүдийн нэг том дутагдал байдаг. Хайртай залуутайгаа хамт байхаараа өөрийгөө мартчихдаг гэмтэй. За хүүхэд гаргавал бүр өнгөрөө. Хүүхэд, нөхөртөө хамаг анхаарлаа тавиад өөрийгөө мартчихдаг. Өөрийгөө тоохоо больсноос яагаачгүй эрт гэрийн авгайн дүрдээ бүр итгэчихдэг юм шиг санагдаад байдаг юм. Хэзээ ч ийм байж болохгүй. Найз залуудаа тавьдаг анхаарал, халамжаасаа 2-3 дахин их анхаарлыг өөртөө тавь. Өөрийгөө сайхан бүсгүй гэж бодож сур. Өөдрөг, өөртөө итгэлтэй, цоглог бас ихэмсэг байхыг эрхэмлэ. Нэг залууд ухаангүй хайртай болонгуутаа хүүхдийг нь гаргах гэж хэзээ ч битгий яар. Хэзээ ч шүү. Хүүхдэд ухаангүй хайртай, хариуцлагаа ухамсарладаг залуу эр хүн ховор. Өөрийнхөө хүүхдийг ч үл тоох тэнэг залуучууд энэ хорвоогоор дүүрэн байгаа. Яагаачгүй хүүхэд гаргаж гэнэдэж болохгүй. Бүсгүй чи, бас та 2-ын үргэлжлэл болох хөөрхөн үр чинь л хохироод хоцордог нь нотлох шаардлагагүй үнэн. Хайртай бүсгүй нь хүүхдийг нь гаргаад л гэртээ суучихвал залуучуудад сонирхолгүй болчихдог.

7. Эр хүнийг хэзээ ч битгий аргад.

Энэ үгийг би дахин дахин хэлье. Бүсгүй хүн бол аргадаад гуйхаар уярчихдаг, буугаад өгчихдөг. Эр хүн бол үгүй. Улам цаашилдаг.

Найз залуу чинь сэтгэл нь хувирсан анхны шинж тэмдэг л илэрвэл түүнд биш өөртөө тавих анхаарал халамжаа нэмэгдүүл. Чи түүнд хичнээн их хайртай байсан ч гэсэн, тэр байдлыг нь үл тоомсорло. Шинэ, өнгөлөг, сүүлийн үеийн загварын хувцас худалдаж ав, өөрийнхөө гоо сайханд илүү анхаар. Улам өнгө ор, улам цоглог бол, харц дээгүүр алх. Өөртөө илүү цаг зав гарга. Сэтгэлээ сэргээж болох бүх зүйлээр оролд. Найз бүсгүйчүүдтэйгээ уулз, шоуд, нарги, цэнгэ. Харин нэг зүйлийг хатуу анхааруулъя. Яг энэ үедээ өөр залуутай хэзээ ч битгий орооцолд. Журамтай бай. Тэр цагт найз залуу чинь байж ядах болно, чамд анхаарлаа хандуулах болно. Энэ бол амьдрал дээр батлагдсан үнэн шүү..

За за залхуу хүрчихлээ. Би эр хүн биш учраас буруу зөрүү бичсэн байж магадгүй. Тэгвэл засаж залруулаарай. Дутуу бичсэн байвал өөрсдөө цааш нь үргэлжлүүлээрэй. Эрчүүд ямар бодолтой байдаг нь надаа ч бас сонин байна.

Эцэст нь хэлэхэд бүсгүй та эр хүний түшиг, нөмөр нөөлөггүйгээр хэн ч биш гэдгээ санаж яв. Эр хүний орон зай гэж томоос том, чухлаас чухал зүйл байдаг. Эр хүнгүй айл эзгүйрч ханхайрдагтай адил, эр хүн үгүйд сэтгэл хоосорч, ганцаарддаг. Нөгөө талаар бүсгүй хүний хайр халамжгүйгээр эр хүн гэдэг бол бас л хэн ч биш. Эр хүн эр зоригтой, хүч чадалтай хэдий ч эмэгтэй хүнгүйгээр өчүүхөн амьтан.