Монгол Улсад улсад түр хугацаагаар ирсэн Солонгосчууд манай иргэдийг зодож, биед нь гэмтэл учруулсан хэрэг өнгөрсөн баасан гарагт гарлаа. Нийслэлийн Баянзүрх дүүргийн XIII хорооны нутагт байрлах “Сүнжин гранд” зочид буудалын хөрөнгө оруулагчид гэх БНСУ-ын иргэн 40 настай Ким Юу Сог, 37 настай Анжи Вонг, 38 настай Мон Жин гэх гурван эрэгтэй согтууруулах ундаа хэтрүүлэн хэрэглэсэн үедээ бүлэглэн манай улсын хоёр иргэнийг тодорхой шалтгаангүйгээр зодож, танхайрсан байна. Хэрэг гарах үед хохирогч болох Б.Оюун-Эрдэнэ найзынхаа хамт уг зочид буудлын хонгилд зогсч байжээ. Гэтэл солонгосчууд хөлчүүрхэн Б.Оюун-Эрдэнэ нарын толгой, гар руу нь шар айрагны шилээр цохиж, гэмтээсэн байна. Тэднийг ийн авирлахад, зочид буудлын ажилчид хүчний байгууллагад мэдээлсэнээр тус чиглэлийн эргүүлийн ажилтнууд уг газарт очиж, тэдний үйлдлийг таслан зогсоожээ. Хүний нутагт ирж, ийн иргэдийг нь шалтгаангүйгээр зодож, танхайрсан Солонгосчуудад Эрүүгийн хуулийн тусгай ангийн 181.1 дэх хэсэгт зааснаар эрүүгийн хэрэг үүсгэн Баянзүрх дүүргийн цагдаагийн хэлтэст шалгаж эхлээд байна. Эрүүгийн хуулийн уг заалтад “Бусдыг илтэд үл хүндэтгэн хүч хэрэглэх буюу хүч хэрэглэхээр заналхийлж, нийгмийн хэв журмыг ноцтой зөрчсөн бол хөдөлмөрийн хөлсний доод хэмжээг тавин нэгээс нэг зуу дахин нэмэгдүүлсэнтэй тэнцэх хэмжээний төгрөгөөр торгох, гурваас дээш зургаан сар хүртэл хугацаагаар баривчлах, эсхүл гурван жил хүртэл хугацаагаар хорих ял шийтгэнэ” хэмээн заасан байдаг юм. Хүний нутарт танхайрсан солонгосчуудыг 72 цагийн хугацаатайгаар саатуулаад байна. Энэ хэрэг гарахын өмнө Хан-Уул дүүрэгт БНХАУ-ын иргэд манай улсын иргэдийг болон цагдаа нарыг зодож, танхайрсан гэх хэрэг гарсан. Одоогоор хятадуудад зодуулсан цагдаагийн ажилтны биеийн байдал тааруу байгаа тул Төрийн албаны ажилтнуудын эмнэлгийн мэс заслын тасагт хэвтэн эмчүүлж байна. Тэднийг удахгүй хагалгаанд оруулах ажээ. Хүний нутагт ийн танхайрсан иргэддээ холбогдох хэргийг үнэн зөвөөр шийдвэрлэж өгнө гэдэгт итгэж байгаа гэсэн утга бүхий албан бичгийг БНХАУ-ын ЭСЯ-наас ГХЯ-нд ирүүллээ. Энэ хэрэгт холбогдсон хятад иргэдийн зургааг нь Хан-Уул дүүргийн цагдаагийн хэлтэс түр хугацаагаар саатуулаад байна