Ерөнхийлөгч Ц.Элбэгдорж: 2011 он гэхэд 0-16 насны хүүхдийн мөнгийг 20 мянга болгож, бусад иргэнд хувь хишгийг хүртээж дууссан байх ёстой

УИХ-ын хаврын чуулган нээлтээ хийлээ. Чуулганыг нээж УИХ-ын дарга Д.Дэмбэрэл үг хэлж байна. Тэрээр “бид ард түмэнд амласан мөнгөө өгөх ёстой. Тийм ч учраас УИХ-ын бүрэлдэхүүн амлалтаа биелүүлэх шийдвэрийг гаргасан” хэмээлээ.

Мөн сонгуулийн тухай хуульд өөрчлөлт оруулахаар зэхэж буйгаа дурьдаж “мөнгө амласан сонгууль ард түмний итгэлийг хөсөрдүүлж, намуудын нэр хүндийг унагадаг нь тодорхой хэмээн илтгэлдээ дурьдлаа.

Чуулганы нээлтэд Ерөнхийлөгч Ц.Элбэгдорж оролцож үг хэлэх ёстой. Нээлтийн дараа УИХ дахь МАХН болон Ардчилсан намын бүлгүүд хуралдах юм.

Энэ удаагийн хаврын чуулганаар шинээр 28, нийт 100 шахам хууль, шийдвэрийн төслийг хэлэлцэх ажээ.

Яг одоо Ерөнхийлөгч Ц.Элбэгдорж үг хэлж байна.

Монгол Улсын Ерөнхийлөгч Ц.Элбэгдорж чуулганы нээлтэд оролцон үг хэлж байна. Тэрээр олон чухал зүйлийг өөрийн илтгэлдээ оруулжээ.

Тэрээр орон нутгийн удирдлагуудын үйл ажиллагааг сайжруулахын тулд тэдэнд тодорхой хэмжээний эрх хэмжээг олгох нь зүйтэй гэлээ. Мөн төрийн албаны зөвлөлийг татан буулгаж, төрийн албаны тухай хуулийг шинэчлэх цаг болсон хэмээн үзэж байгаа ажээ. Ард түмний эрх баригчдаас хүсч буй хариуцлагын тогтолцоог сайжруулахын тулд төрийн албаны босгыг өндөрсгөх нь зүйтэй гэлээ. Мөн Монгол айл гэр бүхнийг талцахад хүргэдэг улс төрийн намуудыг гишүүнчлэлгүй болгох цаг ирснийг санууллаа. Цомхон бүтэцтэйгээр үйл ажиллагаа явуулах шаардлагатай гээд "намуудын тухай ярих болоход сонгуулийн хуулийн тухай ярих болно. Олон удаагийн практиктаа тулгуурлан чамбай сонгуулийн хуулийг гаргах боломж өнөөгийн чуулганы гишүүдэд бий" гэдгийг тэрээр хэлсэн юм. Харин ингэхдээ Монгол улсыг газар нутаг бүрээр нь хувааж, салгасан 76 тойргийг дэмжихгүй гэдгээ шууд илэрхийллээ.

Ард түмэн эрх баригчдаас хэзээ амлалтаа биелүүлэх талаар асууж байгаа. Харин энэ асуултанд тэрээр “2011 он” хэмээн Ерөнхийлөгч хариулсан юм. Хавтгайрсан нийгмийн халамжийг цэгцлэхийн тулд хүүхдийн мөнгийг дахин олгож эхлэх ёстой хэмээгээд “2011 он гэхэд 0-16 насны хүүхдийн мөнгийг 20 мянга болгож, бусад иргэнд хувь хишгийг хүртээж дууссан байх ёстой” гэлээ.

О.Ариунбилэг