Айначуудын өгсөн нэрийг япончууд өнөөг хүртэл хэвээр нь хадгалан ирсэн байна. 

Фүжи уулын бараг төгс гэмээр бага зэрэг огтлогдсон конус шовх орой нь үнэхээр үзэсгэлэнтэй харагддаг. Олон зууны турш энэ уул яруу найрагчид, зураачдын онгодыг хөглөж, үндэстнийхээ ариун шүтээн болсон Фүжи ууланд хүндэтгэл үзүүлэх гэсэн хүмүүс хэдэн зуун жилийн өмнөөс оргил өөд нь хөтлөсөн огцом зөрөг жимээр мацсаар ирсэн түүхтэй. 

XVII зууны үед амьдарч байсан Японы алдарт яруу найрагч Басё энэхүү ариун ууланд нэг биш шүлгээ зориулж байжээ. Түүний бичсэн гурван мөрт-хоккү шүлгүүдийг японы дунд сургуулийн сурагч бүхэн цээжээр мэдэх бөгөөд огтхон ч түгдрэлгүйгээр: 

Тэнгэрт бараан үүлс хуралдаж

Тэртээх уулсын хаяан дээгүүр 

Фүжи уулын цаст тэргүүн цайлалзана... 

гэх ч юм уу эсвэл

Намрын бороо, манан будан,

Үзэгдэх бараа нь харагдахгүй ч 

Үзэсгэлэнт Фүжи сэтгэл сэргээнэ... гэх зэргээр уншина. 

Харин Японы алдартай зураач Хокусай шүлэгч Басёгаас 100 гаран жилийн дараа *Фүжи уулын 36 төрх*, *Фүжи уулын 100 төрх*, зэрэг цуврал зургууддаа хайртай уулынхаа барааг мөнхлөн үлдээжээ. Одоо тэдгээр зургуудын нэгнийх нь хуулбар япон айл бүрийн хананд өлгөөстэй байдаг.

Япончуудын гол шүтлэг болж байсан Шинто шашныхан Фүжи уулыг хүндэтгэн шүтэж байх гол газруудын нэг болгон тунхагласан юм. Тийм болохоор энэхүү уулын ариун оргилд жилдээ ядаж ганц удаа ч болов гарахыг япон хүн бүр үүргээ гэж үздэг.

Фүжи уулын оргилд хүрэх замдаа амрах 10 өртөө бүхий тахирласан замыг барьсан байдаг бөгөөд ариун уулын оргилд гарах гэсэн мөргөлчид хонхтой хулсан таяг уулын бэлээс авч явдаг нь оргилд гарахад нь тус болдог ажээ.

Оргил өөд авирах хүмүүс амрах ээлжит талбай дээр гарч ирэх болгонд тодорхой шатанд гарч ирснийг илэрхийлэх хэрчлээс тэмдгийг тулж яваа таяган дээр нь түлж тавьдаг байна.

Зарим хүмүүс ялангуяа хижээл настай япончууд ариун үүргээ биелүүлэхийн тулд эхлээд хэд хэдэн удаа оролдлого бие халаалт хийдэг ажээ.

Фүжи уулын оргил дахь тогооны хажууд Шинто шашны сүм байх бөгөөд тэндхийн лам нар бурхны ном уншлага үйлдэхийн зэрэгцээ мөргөлчид болон жуулчдад зориулсан бэлэг дурсгалын зүйлс наймаалдаг юм. Фүжи уулын оргилд л авирч гарах гэсэн сониуч хөнгөн бодолтой зарим жуулчид автомашины зам хүрсэн 5-р өртөөнөөс л авиралтаа эхэлдэг.  Тэглээ ч гэсэн бараг 4000 м шахам өндөрт байх оргилд мацаж гарна гэдэг бол тэдний хувьд ч гэсэн булчин шөрмөс, сэтгэлийн тэвчээр сорьсон хэцүү сорилт болдог. 

Энэхүү ариун галт уулын орой дахь тогоо нь жигд биш ирмэгтэй, амсрынх нь тойрог 500 м-т хүрэх, 200 м-ийн гүнтэй байдаг. Түүний амсрынх нь бага зэрэг долгиолсон ирмэг нь лянхуа цэцгийн дэлбээг санагдуулдаг. Нилдээ цасанд дарагдсан, хад чулуурхаг  тогоонд найман нуруу байдгыг ард олон *Яксуда-Фүжи* буюу Фүжигийн найман дэлбээ гэж нэрлэжээ.

Энэхүү галт уулын дээд хэсэг нь маш их огцом бөгөөд 45 хэмийн налуу байдаг бол доод хэсэгтээ Фүжи уулын хормой арай уужуу тойрог мэт санагдана. Фүжи уул хойд талаасаа орчин тойрны байгальд гайхалтай үзэсгэлэнг нэмсэн 5 сайхан нуураар хүрээлэгдсэн байдаг бөгөөд Японы интоор гэгдэх Сакура цэцэглэх хаврын цагаар Фүжи уул нэн үзэсгэлэнтэй болдог. 

Тэндхийн улаан ягаан млд цэцэгс, цэнхэртэн харагдах тэнгэр, уулын доод бүслүүр орчмын нарсан шугуй, оргил тэргүүн дэх мөнх цас эд бүгд нийлээд Хокусая арлын байгалийн сайхантай хосолсон хэзээ ч давтагдашгүй нэгэн найрал хамтлаг мэт болдог. 

Товчхондоо хэлэхэд энэ галт уул, жилийн ямар ч улиралд үзэсгэлэнтэй сайхан харагддаг гэнэ. 

Эртний Японы домог ёсоор Фүжи уулыг МЭӨ286 онд бурхад ганцхан шөнийн дотор бий болгосон ба уул босгохоор товлож шав тавиад байсан газарт нь энэ орны эртний нийслэл Киотогийн орчимд байх цорын ганц нуур болох Бива нуур тогтсон гэдэг.

Үнэндээ бол галт уул нь геологчдийн тооцоолсноор 8-10 мянган жилийн настай гэдэг. Фүжи уул 60 мянган жилийн настай эртний галт уулын сууриндээр үүссэн бол нөгөө суурь болох уул нь мөн ч түүнээс илүү урт настай ууландээр үүссэн байна.

Энэхүү 3 галт уулын дотроос хамгийн залуу, хамгийн идэвхтэй болохын хувьд Фүжи галт уул догшин ширүүн авир араншингаа байнга харуулж байдаг. Японы энэхүү гол галь уул нийтдээ 18 удаа дэлбэрч байсан гэх ба ялангуяа 800, 864, 1707 онуудад хамгийн хүчтэй дэлбэрсэн гэдэг. 1707 онд л гэхэд Фүжи галт уулаас зүүн хойт зүгт 100-аад км зайтай  байдаг Токио хот 15 см зузаан үнсэнд дарагдсан байна.

Одоо энэ уулын орой дахь цас нь 10 сарын турш хайлдаггүй ба хойт энгэрийнх нь цас зунд ч хайлдаггүй байна. 

Жил бүр Фүжи уулын бэлд 5 сая жуулчид ирцгээдэг. Тэднээс 400 мянган хүн нь оргилд гардаг гэсэн тооцоо байдаг.