Moderator : Ixus
Их Монгол Улс байгуулагдсаны 800 жилийн ойн баяр наадмаар түрүүлж, улсын аварга цол хүртсэн Д.Сумъяабазар энэ жилийн баяр наадмыг өнжих нь тодорхой боллоо. Аварга энэ тухайгаа “Таван цагариг” сонины сүүлийн дугаарт албан ёсоор хэлжээ. Тэрбээр уг ярилцлагад “Би 1986 оноос бөхөөр хичээллэж, 1988 онд улсын наадмын хүүхдийн барилдаанд анх зодоглон түрүүлээд дараа жил нь үзүүрлэж байлаа. Түүнээс хойш томчуудтайгаа хүч үзэж, давахдаа давж, унахдаа унан сайн муу хэлүүлсээр улсын наадамд 20 жил барилджээ. Харамсалтай нь тохой, өвдөгний бэртлийн улмаас улсын их баяр наадмаа анх удаа өнжих болчихоод байна. Уяулж сурсан морь гэдэг шиг энэ олон жил барилдсан болохоор наадамдаа барилдахгүй гэхээр сэтгэл санаа таатай биш байна.
1998 оны сорилгоор Б.Ганбат заантай барилдаж байгаад авсан тохойны гэмтлийг бүрэн эдгээгээгүйн хор уршиг одоо гарч байна. Түүнээс хойш мөн ч олон удаа сэдрээж хүндрүүллээ. Дээр нь өнгөрсөн жил олимпийн өмнө циркт бэлтгэл хийж байгаад өвдгөө гэмтээчихсэн. Одоо жаахан сагс тоглоод гүйхээр л хавдаад алхахад хэцүү болоод байна. Мөн ажил байдлын улмаас бэлтгэлээ бүрэн базаах боломж хомс боллоо. 200 гаруй хүний амьдралыг дааж, авч яваагийн хувьд үүнд хариуцлагатай хандах хэрэгтэй. Бөх, ер нь спортын талбарт бие, сэтгэлээ 100 хувь зориулж байж амжилт гаргана. Одоогоор миний хувьд ийм боломж алга. Би ажлыг хийсэн шиг хий, эс бөгөөс чадахгүй бол хоосон дүр эсгэх хэрэггүй гэсэн зарчмыг баримталдаг. Би цагаан сарын өмнө гэмтлээ амжиж эмчлүүлээд барилдчих санаатай Японд очсон. Гэтэл тийм санааны зоргоор болчихдог юм биш байна. 14 хоногт эмчлүүлээд барилдана гэсэн бодолтой очсон надад япон эмч нар бүтэн жилийн эмчилгээ шаардлагатай гэж хэлсэн. Энэ мэт олон шалтгааны улмаас энэ жилийн наадамд зодоглож чадахгүй болчихлоо. Бас жил, ус ч орлоо. Төв цэнгэлдэх хүрээлэнд арван хэдэн мянган үзэгч, дэмжигчийн уухайгаар аварга цол авчихаад барилдахгүй гэж хэлэх эрх надад байхгүй. Дараа жил тодорхой зорилго тавьж барилдана аа” хэмээсэн байв.