Бичлэгийн тоо 2,391
Ардчилсан намынхан өнөөдөр Монгол Улсын Ерөнхийлөгчийн сонгуулийн сурталчилгааны хаалтаа даруухан хийлээ. Нээлтээ сэтгүүлчдэд мэдээлэл хийж, даруухан эхэлсэн тэд хаалтаа ч мөн сэтгүүлчидтэй уулзаж, хэвлэлийн бага хурал хийснээр өндөрлөв. Хаалтын ажиллагаанд Ардчилсан намаас Ерөнхийлөгчид нэр дэвшигч Ц.Элбэгдорж, сонгуульд хамтран оролцсон Ардчилсан намын дарга Н.Алтанхуяг, ИЗН-ын дарга С.Оюун, Ногоон намын дарга Д.Энхбат, УИХ дахь Ардчилсан намын бүлгийн гишүүд оролцсон юм. Гурван намын дарга хаалт дээр үг хэлэв.
Ардчилсан намын дарга Н.Алтанхуяг:
-Түүхэнд анх удаа ардчиллын төлөөх гурван нам нийлж, нэг нэр дэвшигчийг дэвшүүлсэн түүхэн үйл явдал боллоо. Ц.Элбэгдорж Ерөнхийлөгч болбол юу хийх вэ, болохгүй байгаа юуг яаж өөрчлөх вэ гэдгээр хөтөлбөр гаргаж сурталчиллаа. Өөрчлөх шаардлагатай нэг зүйл бий. Энэ бол шударга ёсыг тогтоох явдал. Шударга байдлыг бий болгохын төлөө ажиллахаа илэрхийлж, улс орноо тойрч, ард иргэдийн дэмжлэгийг олж чадлаа. Ард түмэндээ баярлалаа. Тавдугаар сарын 24 бол Монголд байхгүй зүйлийг өөрчлөх өдөр. Ардчилсан Ерөнхийлөгч Ц.Элбэгдоржийг сонгох өдөр юм. Ардчилсан Ерөнхийлөгчөө дэмжиж саналаа өгөхийг хүсье. Ардчилсан нам, ИЗН, Ногоон намын гишүүд, дэмжигчид, нийт ард иргэддээ баярлалаа. Ардчилсан Ерөнхийлөгчтэй болохын ерөөл дэвшүүлье.
ИЗН-ын дарга С.Оюун:
-Монголд ардчилсан сонголт хийх үе ирлээ. Энэ сонголтоос Монгол Улсын хөгжил дэвшил, бидний ирээдүйн хувь заяа шалтгаална. Ардчилсан хувьсгалыг 1990 онд Ц.Элбэгдорж, миний ах С.Зориг нарын олон залуус их зориг, эх орноо гэсэн сэтгэлээр эхлүүлж, түүнээс хойш 20 жил болж байна. Цаашдаа ч Монгол Улсын төлөө, улс орныхоо хөгжлийн төлөө, шударга ёсны төлөө цохилох зүрхтэй байж, сонгуульд идэвх снаачлагатай оролцож, 20 жилийн өмнө хийсэн ардчиллаа баталгаажуулъя. Ирээдүй энэ сонгуулиас хамаарна.
НН-ын дарга Д.Энхбат:
-Бид чухал зүйлийг шийдэх гэж байна. Авлига байх уу, шүүх шударга болох уу гээд олон зүйлийг шийднэ. Монголд олон зүйлийг өөрчлөх цаг болсон. Зөв сонголт хийвэл Монгол Улс зөв чиглэлд хөгжиж эхэлнэ. Бид Ц.Элбэгдоржийн нэрийг зүгээр дэвшүүлээгүй. Олон мянган хүний хүсэл эрмэлзлээр тэтгэгдэж гарсны хувьд үнэлж дэвшүүлсэн. Монгол Улс цэцэглэн хөгжих болтугай.
Үүний дараа Ерөнхийлөгчид нэр дэвшигч Ц.Элбэгдорж үг хэллээ.
Ц.Элбэгдорж:
-Даруухнаар сонгуулийн сурталчилгаагаа хийсэн Ардчилсан нам мөн даруухнаар өндөрлөж байна. Хэвлэлгүйгээр сонгууль явах боломжгүй. Сэтгүүлчдэд баярласнаа илэрхийлье. Ардчилсан намын шийдвэрийг ИЗН, НН дэмжиж цулаараа нэг чиглэлд сонголт хийхэд их ач холбогдол өгсөн. ИЗН, НН-ын гишүүд, дэжигчид, ард түмэндээ баярлалаа. Залуучууд, эмэгтэйчүүд, ахмадууддаа баярлалаа. Монголчуудын сонголтын үр дүн зөв гарна. Итгэсний итгэлийг авч, итгэж чадаагүйн хүлээснийг гүйцээж ажиллана. Сурталчилгааны туршид гурван гол зүйлийг анхаарч ирсэн. Нэгд, шударга ёс. Шударга ёс алдагдсанаас хямрал үүсч байна. Авлигад автсан төр хүчгүй, ард түмэн ядуу байна.
Хоёрт, ард иргэдээ эзэн болгоё. Ард түмэн баялгийнхаа эзэн болбол ардчилал ялна. Эх орны хишиг 1,5 сая төгрөг дээр Эрдэнийн хувь нэг сая төгрөг, нийт 2,5 сая төгрөг олгох боломжтой.
Гуравт, ажилгүйдэл байна. Хүмүүсээ ажилтай, мэргэжилтэй болгож, жижиг, дунд үйлдвэрлэлийг дэмжиж хөл дээр нь босгоё, Хүүхдийн мөнгийг нэмнэ. Оюутныг дэмжиж, эхчүүдийн одонгийн болзлыг хөнгөлье. Ахмад үеэ халамжилъя. Хойч үе нь сайхан амьдарна гэсэн итгэлийг тэдэнд өгье.
Сонгуулийн үеэр олон гүтгэлэг гарсан. Миний өвөг дээдсийн гарал үүсэлтэй холбоотой нь ч байсан. Миний өвөө улаа нэхэж өртөөнд ажиллаж байсан. Хамгийн шударга хүн улаач хийдэг байсан. Миний аав Халх голын дайнд явж цэргийн албыг таван жил хаасан. Миний долоон ах бүгд цэргийн алба хаасан. Ээжийн хоёр ах цэрэгт явж Халх голд амиа алдсан. Би Баатархайрханы өвөрт төрсөн хүн. Тэнд баатарлаг хүмүүс амьдрахаас биш будааны соёлтой хүн амьдрах аргагүй газар. Тавдугаар сарын 25-ны үүр цайхад 24-ний шөнө шиг энэ гүтгэлэг замхарна. Би Н.Энхбаярын хийж чаддагийг хийж чадна. Бас хийж чадахгүйг хийнэ.
Би амьдралдаа гурван удаа тангараг өргөсөн. Цэрэгт очоод, ардчилсан хувьсгал хийхдээ, мөн Улсын Бага хурлын гишүүн болоод тангараг өргөсөн. Сая сурталчилгаагаа эхлэхдээ Бурхан халдун ууланд гарч тангараг өргөсөн. Ээж маань төрдөө шударга, түмэндээ ээлтэй яваарай гэсэн. Энэ бол миний зүрхний тарни. Цэргийн хүний ёсоор шинэ манаа, ажилчин хүний ёсоор шинэ ээлж хүлээж авах гэж байна. Төрийн ачаа үүрэхэд бэлэн байна гэв. Үүгээр хаалтын ажиллагаа өндөрлөлөө.
Д.ОЮУН
- Холбоотой бичлэг :
- http://www.mglclub.com/1722415/f4c/trackback
