Эр хүний хувьд ид жагссан, дөрөө даахуйц 46 нас хүрэх байсан С.Зориг агсан энэ өдөр нарт хорвоод мэндэлсэн билээ. Түүний тухай ярихаар аравдугаар сарын 2-ны хар өдөр сэтгэлд шууд буудаг. Хорвоод мэндэлсэн дөрөвдүгээр сарын 20-ноос нь илүүтэй аймшигт дурсамж дагуулсан өдрийг монголын ард түмэн зүрхэндээ тээж явдаг.
Дугуй хүрээ бүхий нүдний шилтэй, шингэвтэр халимаг нь салхинд хийссэн ухаалаг залуу 1990 онд ардчилсан хувьсгалыг Сүхбаатарын талбайгаас эхлүүлж байсан түүхийг энэ өдөр эргэн дурсъя. Гэнэн хонгор насандаа монголын хээр талд соёлын үр тарьж явсан "Сэрэлт" киноны доктор, сайхан ээжийнх нь дүрийг санацгаая.
С.Зориг олон удаа дөрөвдүгээр сарын 20-нд төрсөн өдрийн бялуу, хайртай хүмүүсийнхээ сэтгэлийн үг, сарнай цэцэг, дурсгалын бэлэг хүлээн авдаг байсан байж таарна. Харин сүүлийн хэдэн жил чимээ аниргүйд гав ганцаараа уйтгарлан суугаа болов уу. Гэсэн ч таны зүг хийсэн бүхэнд тань талархсан ард түмний сэтгэлийн зам мөнхөд үргэлжилж, хөшөө дурсгал адил хэзээд балрахгүй ээ.
Өнөөдөр С.Зориг агсны хөшөөнд цэцэг өргөх ёслол болно.
Дууртлаа ширтэх тэр зүгийн тэнгэрт
Дууны цагаан үүл ургаад өгдөггүй ч байгаа даа
Тэвчээрийн шидээс ханзартал эгшиг аялгуу зайдлан
Тэрний минь бүлээхэн амьсгаа хүрээд ирдэг ч үгүй байгаа даа
Сул асгарах нулимсанд зэрэглээтсэн уулсын цаанаас
Шувуудын өнцөгeт цуваа ганганаад ирдэггүй ч байгаа даа
Сууж жаргаагүй ч санаж явах чиний минь
Сүүдрийн нь сэмэрхийг зуугаад ч ирдэг ч үгүй байгаа даа.
- Холбоотой бичлэг :
- http://www.mglclub.com/1591722/7a5/trackback
