Өчигдөр буюу даваа гаригийн өглөө Италийн төв хэсэг буюу нийслэл Ромоос ойролцоогоор 95 км-ийн зайд 6,3 баллын хүчтэй газар хөдлөлт боллоо. Үүний улмаас өнөөдрийн байдлаар 150 хүн амь үрэгдэж, 1500 гаруй хүн бэртэж гэмтээд байна. Мөн ойролцоогоор 50 мянган хүн гэр оронгүй болжээ.
Газар хөдлөлтийн чичиргээ газрын гүндээ 10 орчим км гүнд орон нутгийн цагаар 03:32 цагт анх мэдрэгдсэн гэж АНУ-ын газар зүйн судлалын төвөөс мэдээлжээ.
Газар хөдлөлтийн улмаас учирсан хохирол Акила хотын 120 км орчим газар нутгийг хамарсан байна. Олон тооны барилга байгууламжууд мөн түүний дотор эртний түүх дурсгалын барилгууд ихээр сүйджээ. Акила нь Абруззо бүс нутаг орчмын хот бөгөөд Италийн төвд оршдог юм.
“Аврах ажиллагаанд 4000 хүн оролцож, Иргэний хамгааллын албаныхан 30 мянган иргэнд туслах тусгай байр гарган ажиллаж байна” хэмээн Италийн ерөнхий сайд С.Берлускони мэдээлж байна. Мөн амь үрэгдсэн 150 хүний 100 орчим хүнийг таних үйл ажиллагаа явагдаж байна гэж албаныхан ярьжээ.
Италид 1980 онд мөн 6,5 баллын хүчтэй газар хөдлөлт болж 3000 хүн амь насаа алдаж байжээ
GoGo