Хойд Солонгосын талаас аюул гарч ирвэл АНУ гараа хумхиад суухгүй гэж АНУ-ын Батлан хамгаалахын сайд Роберт Гейтс мэдэгдсэн юм. Пхеньяны үйл ажиллагаа бүс нутагт зэвсэглэлээр хөөцөлдөх уралдааныг гаргаж ирнэ хэмээн Вашингтон түгшиж байна. НҮБ-ын Аюулгүйн зөвлөлөөс уучлалт гуйхыг шаардаж байгаа Хойд Солонгос зургадугаар сард тив алгасан нисэх пуужингийн шинэ туршилтыг хийх бололтой.

Хойд Солонгос цөмийн зэвсэгтэй байхтай АНУ эвлэрэхгүй. Өнгөрсөн долоо хоногт Сингапурт болсон Ази, Номхон далайн орнуудын цэргийн дээд удирдлагын жил тутмын уулзалт дээр энэ тухай АНУ-ын Батлан хамгаалахын сайд Роберт Гейтс мэдэгдсэн билээ. “АНУ эсвэл Азийн ямар нэгэн бүсэд ноцтой сүрэл авчрах боломжоо Хойд Солонгос нэмэгдүүлж байгааг бид хжуугаас нь тайван хараад сууж чадахгүй” хэмээн сайд өгүүлжээ. “Хэрэв энэ маягаар БНАСАУ үйлдлээ үргэлжүүлээд байх юм бол бүс нутгийн тогтвортой байдалд ноцтой аюуул үүсэхээс гадна энэ бүсэд зэвсэглэлээр хөөцөлдөх мэтийн тэмцэлдээнийг гаргаж магадгүй” гэсэн сайдын үгийг Reuters агентлаг иш татсан байна.

Батлан хамгаалахын сайд Хойд Солонгосын цөмийн хөтөлбөрийг “айдас дагуулсан ирээдүйн дохио” гэж нэрлээд түүнийг Ираны цөмийн хөтөлбөртөй зэрэгцүүлэн авч үзлээ. Гэхдээ энэ талаар Хойд Солонгос тэргүүлж байгаа ба харин Иран өөрийн нутаг дэвсгэртээ МАГАТЭ-гийн шинжээчдыг оруулсан гэж онцлов. Цөмийн асуудалтай холбогдуулан БНАСАУ ба Иранд “хоёр оронд олон улсын хэм хэмжээг зөрчвөл ямар хүнд байдгийг мэдрүүлсэн” хатуу хориг арга хэмжээ авахыг Гейтс уриаллаа.

Хойд Солонгос тавдугаар сарын 25-нд цөмийн туршилт хийсэн ба ойрын зайн хэдэн пуужинг харвасан юм. Өнгөсөн бямба гаригт тив алгасан нисэх баллистик пуужинг туршихаар бэлтгэж байгаа тухай яриа гарч ирлээ. Гэхдээ цөмийн туршилтын мэдээлэлд Пентагон эргэлзэж байгаа. Америкийн Батлан хамгаалах яамны тагнуулын дагуулуудаас авсан зургаар Пхеньяны хиймэл дагуул хөөргөсөн гэх бүсэд хөл хөдөлгөөнтэй болсныг илэрүүлжээ. Гэхдээ тэр туршилт хийсэн гэх бүсийн агаарын шинжилгээ болон бусад шалгалт яг цөмийн бөмбөгийн туршилтыг хийсэн гэх тодорхой дүгнэлт хийх боломжийг өгсөнгүй. Бүх талын шинжилгээ судалгааны дараа л жинхэнэ дүгнэлт гарах гэнэ.

Яг одоогоор өнгөрсөн долоо хоногийн цөмийн туршилттай холбогдуулан НҮБ-ын Аюулгүй зөвлөл тогтоолоо батлаагүй байна. Дөнгөж сая энэ тогоолын утга тодорхой болж эхлэв. Хойд Солонгосын эсрэг хориг арга хэмжээг чангатгах тогтоолын төсөлд Пхеньянын анхны цөмийн туршилтын дараа авсан арга хэмжээгээ улам чангалах тухай тусгагдсан гэнэ. Худалдаанд хязгаарлалт хийж, тус оронд зэвсгийн нийлүүлэлтэд бүрэн хориг тавих, олон улсын хамтын ажиллагааг явуулж болохгүй Хойд Солонгосын үйлдвэрүүдийн жагсаалтыг өргөтгөх болон тэдний удирдлагыг зарим орнуудын нутаг дэвсгэрт орохыг хориглох зэрэг арга хэмжээг авахаар уг тогтоолын төсөлд тусгагджээ. Япон улс Хойд Солонгостой агаарын харьцаагаа зогсоохын төлөө байна. Тогтоол батлагдаагүй байгаа ч Хойд Солонгос НҮБ-ын Аюулгүйн зөвлөлөөс уучлалт гуйхыг шаардаад амжлаа. “Саяханы цөмийн туршилт бол бидний ил тодоор зарлаж байсан мэдэгдлийнхээ дагуу улс орны батлан хамгаалах асуудлынн нэг арга хэмээ юм. Өнөөгийн байдал хурцатсаны буруу нь АНУ болон түүний хань хамсаатнуудад ноогдоно. Тэд БНАСАУ-ын энхийн зориулалттай хиймэл дагуул хөөргөсөн асуудлыг НҮБ-д санаатайгаар хэлэлцүүлэн түүнийг шүүмжлүүлсэн юм” хэмээн энэ бямба гаригт тараасан Хойд Солонгосын ГХЯ-ны мэдэгдэлд өгүүлсэн байна. БНАСАУ НҮБ-ын Аюулгүйн зөвлөлөөс уучлалт гуйхыг хатуу шаардсан ба тэр нь өнөөдөр хүчин төгөлдөр” хэмээн уг мэдэгдэлд онцолжээ.

Зургадугаар сарын дундуур Хойд Солонгос баллистик пуужингийн туршилт хийж магадгүй тухай мэдээлэл бямба гаригт гарсан байна. Энэ тухай мэдээлэл сайтай эх сурвалжаас авсан мэдээндээ үндэслэн Өмнөд Солонгосын “Ренхад” агентлаг мэдээлсэн байна. Үүний өмнө Reuters агентлаг Мусуданы хошуун дахь пуужин хөөргөх талбайд тив алгасан нисэх пуужинг авчрахаар Хойд Солонгосын Пхеньянын ойролцоох үйлдвэрт бэлтгэл хийгдэж байгааг мэдээлсэн юм. “Хөөргөх талбайг бэлтгэхэд хоёр саар хэрэгтэй ч Хойд Солонгос үүнийг хоёр долоо хоногийн дотор хийж чадах ба пуужингийн туршилт зургадугаар сарын дунд үеэр болно гэж тэр мэдээлэл сайтай эх сурвалж тус агентлагт ярьжээ.