Эхнэр нөхрүүд, ээж аав болох шийдвэрийг хамтдаа гаргаж, жирэмсний хугацаанд болон төрсний дараа харилцан бие биедээ дэмжлэг туслалцаа үзүүлж байх ёстой. Хэдийгээр жирэмсний үед болон төрсний дараа бүх ачааг ээж ганцаараа үүрч байгаа мэт харагддаг ч аавуудын сэтгэлзүй болон амьдралын хэв маягт томоохон өөрчлөлт ордог.
Эмэгтэй хүнд энэ бүх хугацааны туршид маш их дэмжлэг туслалцаа хэрэг болно. Хэрвээ ямар нэгэн байдлаар дэмжлэг туслалцааг авч чадахгүй бол ганцаардсан эх маань төрсний дараах үед нэлээд хүнд сэтгэлзүйн гүн дарамтад орох нь бий. Уг дарамт нь улмаар нярай хүүхдийн өсөлт бойжилтод сөргөөр нөлөөлнө, мөн эхнэр нөхөр хоорондын харилцааг муутгах үр дагавартай байдаг.
- Эхнэртээ цаг зав гаргадаг, түүнд хайр энхрийллээ үйл хөдлөл, үг яриагаараа алхам тутамд мэдрүүлж, сэтгэл санааг нь үргэлж хуваалцдаг, биеийнх нь хэлбэр галбир яаж ч өөрчлөгдсөн түүнийг хайрласан хэвээр байгаагаа илэрхийлэн ойлгуулдаг, түүнийг ядарч сульдсан үед нь удирдлагыг гартаа авдаг, гэрийн ажил болон бусад хариуцлагыг хамтдаа үүрдэг хань нөхөр бол жирэмсэн болон төрсөн эхийн сэтгэлзүйд эерэг нөлөө үзүүлж чадна.
- Аавууд жирэмсэн ээжүүдийн биед явагдаж буй дааврын өөрчлөлт, ядарч сульдсанаас үүдсэн зан төлвийн огцом өөрчлөлт, уур хилэнг тэсэж өнгөрүүлдэг байх ёстой.
-Бэлгийн амьдралд гарч буй өөрчлөлтүүдийг хосууд илэн далангүй ярилцаж, асуудал үүсгэлгүй шийдвэрлэж, аль болох түр зуурын гэсэн утгаар нь ойшоохгүй байх хэрэгтэй.
- Төрөхийн өмнөх үед ямар нэгэн сургалтад суухаар бол хоёулаа хамтдаа сууж, аавууд эмчийн хяналтад очих бүрт нь хамт явж, идэвхтэй байх хэрэгтэй.
- Төрөхийн өмнө болон төрсний дараах бүх төлөвлөлтийн жагсаалтад үүрэг хариуцлагыг эн тэнцүү хувааж, хуваарилах хэрэгтэй.
- Төрсний дараа хүүхдийн асаргаа сувилгаа, бүүвэйлэн унтуулах ажилд оролцох ёстой. Аав та хүүхдээ хөхүүлэхээс бусад бүх зүйлийг хийж чадах бүрэн чадвартай шүү дээ.
- Шаардлагатай тохиолдолд хүүхдээ ганцаараа асарч, энэ хугацаанд эхнэрээ амрааж, аав хүний хувьд өөртөө итгэх итгэлийг олж авах хэрэгтэй.
- Өдрийн туршид ажлынхаа дундуур үе үе эхнэртэйгээ утсаар холбогдон эхнэрийнхээ болон хүүхдийнхээ биеийн байдал, шинэ соргог зүйлсийг талаар мэдээлэл авч байх нь таны гэр бүлд халуун дулаан, дотно уур амьсгалыг авчирч, хүүхдээ аав ээж хүний хувьд хамтдаа хайрлах зөв заншлыг хэвшүүлнэ.
- Заримдаа эхнэртээ сайхан сюрприз баривал та хоёрын харилцаа үргэлж шинэхэн, халуухнаараа байх болно.
- Ийм байдалтай ч нөхөртөө хайрлуулж, таалагдаж байгаагаа мэдэрсэн эмэгтэй хүн жирэмсний сэтгэлзүйгээс амархан гарч, тайвшрах болно. Ингээд эхнэр тань өөртөө итгэлтэй, хүүхдээ сайн асарч, түүний бүхий л хэрэгцээг дуртайяа, сэтгэл тэнүүн хангаж, аз жаргалтай гэр бүлээ цаашид ч энэ хэвээр нь авч явахын төлөө өөрийгөө зориулах болно.
- Хэрвээ шинээр мэндэлсэн үр тань танай анхны хүүхэд биш, ахтай эсвэл эгчтэй бол аав та ээжийн нуруун дээр тэр хүнд ачааг хөнгөлөн том хүүхдээ үргэлж асран, түүнтэй тоглож, хэрэгцээг нь ханган, нэг хэсэгтээ л үүнийг өөрийн үүргээ болгох ёстой. Ээжийн оролцоо зайлшгүй шаардлагатай үед нярай хүүхдийг та асарч байвал илүү зүгээр.
- Шинээр мэндэлсэн хүүхдийн дараа өөрчлөгдсөн гэр бүлийн амьдрал нь хосуудын харилцаанд эрсдэлтэй үйл явц болохыг тэд анзаарах нь хамгаас чухал. Олон судалгааны үр дүнгээс үзэхэд ихэнх гэр бүл салалтууд жирэмсний үеийн хямралаас болж хосуудын бие биеэсээ хөндийрснөөс шалтгаалдаг болох нь нотлогдсон байдаг. Энэ үед тэсвэр тэвчээр, харилцан ойлголцол маш чухал.
yg unen bichjee aav iim l bh yostoi