“Харанга” хамтлагийн дуучин Х.Лхагва­сүрэн Орхон аймагт машинаар хүн дайрч хөнөөсөн тухай мэдээлэл түгж, түүнийг согтууруулах ундаа хэрэглэсэн байсан, мансуурсан хэмээх цуу үгтэй давхцах болов. Тухайн өдөр яг юу болсныг тодруулахаар тус хамтлагийн хөгжимчин, гавьяат жүжигчин Ц.Чулуунбаттай утсаар холбогдлоо.

-Өнгөрсөн баасан гаригийн орой яг юу болсон юм бэ, Та нарыг хамтлагаараа баяр тэмдэглээд, дуучин Х.Лхагвасүрэн сог­туу­гаар машин жолоодож, хүний аминд хүрсэн хэмээн мэдээлж байгаа?
-Их харамсалтай байна. Аливаа зүйлийг үнэнээр нь мэдээлэх хэрэгтэй шүү дээ. Өмнө нь хоригдож байсан, мансууруулах бодис хэрэглэсэн, согтуу байсан л гэх юм. Тэр өдөр бид Орхон аймгийн төв талбайд тоглолтоо дуус­гаад “Eagle” телевизийнхэнд ярилцлага өгсөн. Тус телевизийнхэн манай хамтлагийн тухай нэвт­рүүлэг хийхээр ирсэн байсан юм. Ямар нэгэн баяр тэмдэглэж, архи дарс уух цаг, зав байгаагүй. Бидний хэн нь ч, тэр тусмаа Лхагваа огт архи уугаагүй.
Ээж нь Эрдэнэтэд хамаатныдаа ирсэн бай­сан учраас, Лхагваа ээжтэйгээ уулзахаар орой буудлаасаа гарсан юм. Гэхдээ ганцаараа биш , бидэнтэй хамт аялан тоглолтод явж байгаа техникийн хоёр ажилтантай явсан.

-Яагаад энэ осол болсон юм бол?
-Санарсаргүй л зүйл болсон байна. Лхагвааг явж байхад нь Орхон аймгийн залуус тааралдаж гарын үсэг авсан гэсэн. Харин тэдэнтэй уулзчихаад машиндаа суугаад хөдлөх гэтэл зүүн гар талаас нь гэнэт хүн ороод ирсэн байгаа юм. Хөдлөх үед өгсөн хааз, тухайн хүний орж ирсэн хүчтэй давхцаад л ийм хэрэг болчихлоо. Тэнд байсан залуус ч үүнийг гэрчилнэ. Түргэн тусламж дуудаад ирээгүй учраас тэнд байсан залуус машиндаа хохирогчийг суулгаад эмнэлэгт хүргэж бололцоотой бүхий л эмчилгээг хийсэн боловч, ойролцоогоор хагас цаг болоод  нас барсан.

-Хохирогч хэн гэж хүн байсан бэ, ар гэрийнхэнтэй нь уулзсан уу?
-Орхон аймгийн тохижилт үйлчилгээний газарт ажилладаг 50 настай эрэгтэй хүн байсан. Тухайн үед согтуу байсан юм билээ. Лхагваагийн ах дүү нар нь талийгаачийн гэр бүлийнхэнтэй уулзсан. Бид ч уулзахад бэлэн байгаа. Гэр бүлийнхэн нь их сайхан хүмүүс байна лээ. Маш их харамсалтай байна.

-Дуучин Лхагвасүрэн хоригдож байгаа гэсэн. Сэтгэл санаа нь ямар байна?
-Лхагваагийн сэтгэл санаа хүнд, шоконд орсон байдалтай байна. Гэхдээ батлан даалтад гарчихсан байгаа. Цагдаагийн газар мөрдөн байцаалт эхлүүлсэн учраас учир нь олдоно. Хэвлэл мэдээллийн ажилтнуудыг үнэн зөв мэдээлэл өгөөсэй гэж хүсэж байна.

-Хэргийн газарт шалгалт хийсний дараа ямар дүгнэлт гаргасан бэ, тухайн үед согтуу байгаагүй гэдэг нь нотлогдсон уу?
-Хэргийн газарт хэмжилт хийж үзэхэд, хурд хэтрүүлсэн болон архи хэрэглэсэн зүйл илрээгүй.

-Мансууруулах бодис хэрэглэсэн байсан болов уу гэсэн сэжиг олон хүнд төрсөн байх аа?
-Тийм хэрэгт холбогдож байсан гээд ингэж дүгнэж болохгүй. Мансууруулах бодис хэрэглээгүй. Одоо Лхагваад ч их хүнд байгаа. Бид буян хийж, үзэгчиддээ бэлэг барихаар  энэ аялан тоглолтыг эхлүүлсэн шүү дээ.

-Мэдээж танай тоглолтууд хойшилж байна уу?
-Тийм ээ. Тодорхой  бус хугацаагаар хойшилж байна. Гэхдээ бүх зүйлийн учир олдоно байх. “Харанга” хамтлагийнхан  бид талийгаачийн ар гэрийнхэнд  эмгэнэл илэрхийлж байгааг уламжилж өгнө үү хэмээн Та бүхнээс хүсэж байна. Маш их харамсалтай байна.

Жич: Энэ талаар Орхон аймгийн Цагдаагийн газрын дарга, хурандаа Д.Амарбаясгалангаас тодруулахад “Тухайн үед дуучин Х.Лхагвасүрэн согтууруулах ундаа хэрэглээгүй байсан нь тогтоогдсон. Хэрэг мөрдөн байцаалтын шатанд яваа учраас хуулийн дагуу үүнээс илүү мэдээлэл өгөх боломжгүй” хэмээн хариулсан юм.