-Гадаадад аялахдаа дадамгай эрхэм төрийн түшээд, гаднаас зочин урихдаа сурамгай дарга нар ямар хаягийн өмнө зогсч, ямар ширээн дээр суух гэж буйгаа эхлээд харчихдаг байгаасай-

Манай улсын Ерөнхийлөгч, зарим сайд, дарга нар саяхан телевизээр гарч байна. Өмнөд хөршийн хаяа нийлсэн Хөлөнбуйр аймгийн удирдлагуудтай баяр хөөр болон тууз хайчилж байх аж. Хятад маягийн өтгөн улаан цэцэг хэлхсэн улаан туузыг үйл урладаг хайчаар хичээнгүйлэн таслах тэд ар талдаа ямархан хаяг өлгөчихөөд зогсч байгаагаа харин анзаарах сэхээ байсангүй. Хөх цэнхэр дэвсгэрийн эхэнд БНХАУ-ын Хөлөнбуйр хот хэмээн дурайлгасныг харвал Өвөрмонголд ямар нэг баяр болж, түүнд манай Ерөнхийлөгч тэргүүтэй эрхмүүд очсон ч юм шиг. Гэтэл телевизээр хэлж байгаа тайлбар дүрсээсээ зөрөөд явчихлаа. Манай зүүн бүсийн хөгжлийн тулгуур төв Дорнод аймгийн төвд болж байгаа уулзалт семинар гэнэ. За яахав, хөршөө хүндэлж хаяг сэлтийг нь өмнөө бичсэн л юм биз. Харин манай улс нэрээ сольж, ханз бичиг кирилл үсгээс данхайжээ.                                                                        

"Могол Улсын Дорнод аймаг" гэсэн нэр мөнөөх цэнхэр дэвсгэр дээр харагдаж байна. Энд би алдаж бичээгүй шүү. Монгол биш, "Могол Улс" гэсэн байгааг зургаас хараарай. Могол гэж монгол угсааны хэсэг хүн Афганистаны хойгуур нутагладаг, талибуудад нэлээд дарлуулдаг юм гэсэн. Зоримог зангаараа бусдаасаа ялгардаг болохоор жаахан шоовдордуу аж төрдөг юм гэнэ лээ. Тэдний нэрийг "зээлсэн" нэг тиймэрхүү хаяг ар талдаа өлгөжээ. Манайхан үзэмжийг нь бодоод, эсвэл амарчлаад урд хөршдөө захиалж тэр хаягийг бичүүлжээ, янз нь. Нөгөөдүүл нь санаандгүй гэж хэлэхэд хэцүү шалтгаанаар манай улсын нэрээс нэг үсгийг нь гээчихсэн байна. Өвөрлөгчид кирилл бичиг мэдэхдээ тааруу л даа. Гэлээ гэхдээ захиалж хийлгэсэн самбараа ариутгаад шүүчих Монгол талын эрхэм олдоогүй гэвэл худлаа. Манайхан бол хөршийнхөө нэрийг "Хяад" гэж лав бичихгүй. Хүн захиалж хийлгэсэн юм чинь нягталж шалгах нь гарцаагүй. Ханз бичиг мэдэхгүй ч гэсэн асуугаад засуулчих хятад хүн олдоно доо. Хүнийг муулахаа больё. Манай эрхмүүдийн зогсч байгааг.

Монгол Улсын Ерөнхийлөгч Н.Энхбаяр, УИХ-ын эрхэм гишүүн, сайд асан Д.Одбаяр, Барилга, хот байгуулалтын сайд Ц.Цолмон, Дорнод аймгийн Иргэдийн төлөөлөгчдийн Хурлын дарга Ц.Шинэбаяр нар "Могол" Улсаа төлөөлөн тууз хайчлаад сүйд. Хадаг дэлгэн зэрэгцэн зогссон ар, өвөр монгол охидын гар дээрх царан дээр хайчаа тавиад алга нижигнүүлэн ташиж зогсоо тэдэнд "эргээд хараач" гэж хэлэх хүн алга л байсан юм байх даа, тэнд. Хүнээс юм авч, барьсан бадар нь бүтэж л байвал улсын нэр сүр огт хамаа алга болжээ, дарга нарт.

Газар дээр нь очоод ирсэн хүний хэлснээр жижиг, дунд үйлдвэрлэгчдийн бүтээгдэхүүнээ дэлгэсэн үзэсгэлэнгийн 70 хувийг өвөрлөгчид эзэлсэн байжээ. Танхимд цугларагсдын мөн төдий хувийг өмнөд хөршийнхөн бүрдүүлж, манайхан цочихдоо бие биеэ дуудан хань татсан гэнэ лээ. Монголын зүүн бүсийнхний семинар бус, зүүн өмнөд хөршүүдтэйгээ хийсэн "эв модны наадам" болсон ч юм уу даа.

Гадаадынхан манайхнаар дамшигласан тохиолдол ганц энэ биш. Өнгөрсөн жил БНСУ-д хийсэн Монгол Улсын Ерөнхийлөгчийн айлчлалын үеэр хоёр улсын Ерөнхийлөгчийн баримт бичигт гарын үсэг зурсан ширээн дээр манай төрийн далбааны соёмбыг уруу нь харуулаад хатгачихсан байв. Мөн Сөүлийн нэг зочид буудлын үүдэнд манай далбаа уруугаа харчихсан намирч байсан гэнэ билээ.

Гадаадад аялахдаа дадамгай эрхэм төрийн түшээд, гаднаас зочин урихдаа сурамгай дарга нар ямар хаягийн өмнө зогсч, ямар ширээн дээр суух гэж буйгаа эхлээд харчихдаг байгаасай. Тэгэхгүй бол эвгүй утгатай бичгийн өмнө алга ташаад зогсч байж мэдэх нь байна шүү, төрийн сүлд өршөө.