Хувцас нь хүний дүр төрхийн салшгүй нэг хэсэг юм. Хүн амьдралдаа сэтгэл хангалуун байхын хамгийн эхний шат нь гадаад үзэмж билээ. Хүн өөрийнхөө бусдаас давуу гэдгийг мэдрэхийг, түүнийгээ хувцсаараа дамжуулан илэрхийлэхийг хичээж байдаг учир  хувцас нь  гадаад үзэмжээрээ  сайхан бөгөөд чанартай байхаас гадна практик талааса биед эвтэй эрүүл ахуйн шаардлага хангасан гадны нөлөөнөөс хамгаалах үүрэгтэй байдаг. Хувцас нь харааны урлаг учир гаднаас авах мэдээллийн ихэнхийг хувцсаар өгч болно. “Зигмунд Фрейд” –ийн онолыг авч үзвэл хүний хийж буй бүх үйлдэл нь зөвхөн 2 хүсэл эрмэлзэл дээр тогтдог.
1. Өөрийн бусдаас онцгой гэдгийг мэдрэх
2. Эсрэг хүйсийн хүндээ таалагдах
Хувцаслах соел  Хүний өмссөн хувцас нь хэл яриа, дохио зангаа, зан араншингийн нэгэн адил уг хүний тухай бодит, багц мэдээллийг өгдөг. Тухайн хүний нийгэмд гүйцэтгэх үүрэг, соел боловсрол, зэрэг зиндаа, үзэл бодол, таашаал, мэдрэмж, үнэт зүйлд хандах хандлага, ааш араншин мөн бэл бэнчинг нь хүртэл хувцсаар нь тодорхойлж болно. Хүмүүсийн тодорхой хүрээ, хэсэг бүлэг бүр өөр өөрсдийн, онцлогтой “хувцаслах хууль”-тай байдаг. Аливаа хүн хувийн ба албан шугамаар ямар нэгэн тодорхой хүрээнд нэвтэрч байр сууриа эзлэхэд хувцаслалт, гадаад төрх нь маш их үүрэг гүйцэтгэнэ. Бид хэн хүнтэй уулзаад ихэнх тохиолдолд бодит дүр байдлыг нь тэр хүний бие бялдар, дуу хоолой, үйл хөдлөл, үнэр болон ихэвчлэн өмссөн хувцаснаас уламжлан ухаан санаанд үүссэн бодолтойгоо өөрийн эрхгүй харьцуулан боддог. Хэрэв бодол санаанд ургасан тэр дүр зураг нь бидний харж сонсож буй төрх байдалтай тохирох буюу авцалдаж байвал “аятайхан, нүдэнд дулаан” гэсэн дүгнэлт хийдэг бол тохироогүй тохиолдолд дургүйцэл, сөрөг сэтгэгдэл төрж эхэлдэг.
Хэрэв поп дуучин асар том теле-шоунд өвдөг нь уранхай жинс өмсчихөөд дуулж байх нь ердийн зүйл байдаг бол дарга нь ажилтнаа ийм байдалтай ажилдаа ирвэл тааламжтайгаар хүлээн авахгуй нь лавтай. Иймээс “Юу өмсөх вэ?” гэдэг нь их чухал бөгөөд нөхцөл, шалтгаан, зорилгодоо тохирох естой юм. Мөн үүнээс гадна тогтсон уламжлал,  зан заншил ёс зүйн хэм хэмжээний дагуу оролцож буй арга хэмжээ, нөхцөл байдал, онцлогт тохируулан хувцаслах бичигдээгүй хууль үйлчилсээр байна.  
Ажил хэргийн ертөнцөд ажлын байр болон албан тушаалын төлөө тэмцэл мөнхөд үргэлжилж байдаг. Мэдээж энэ тэмцэлд хамгийн санаачлагатай, ажил хэрэгч нь, хамгийн мэдлэг боловсролтой нь, бас хамгийн сайхан хувцасладаг нь ялна. Ажил хэрэгт амжилт олох, эсвэл бүтэлгүйтэхэд хувцас гол хүчин зүйлийн нэг байдгийг ямагт санах хэрэгтэй. Стиль нь нийгмийн тогтоц, эдийн засаг, улс төр хүн тус бүрийн сэтгэл зүйн нөлөөллөөс урган гардаг дүрслэх урлагийн бүх төрөлд орших ба стиль бүхэнд өөрийн гэсэн утга санаа дүр төрх сэдэв зохиомжийн аргууд байдаг. Хүний соелын түвшин өндөр байх тусам моодны золиос болох нь төдий чинээ бага байх ба энэ нь тухайн хүний үзэл бодол, гоо зүйн таашаалын тогтворжилтой холбоотой. Өөрөөр хэлбэл өөрийн гэсэн онцлогтой байж моодыг сохроор дагаж хэт автагддаггүй  бөгөөд энэ хүн стилийг илүүд авч үзнэ. Стиль гэдэг нь ямар ч дүрийг тодорхойлж болох дүр төрх, шинж чанар онцлогуудыг хэлнэ. Мода нь хүнийг гайхуулах дуурайлгах бусдаас хоцрохгуй байх чанарыг агуулж байдаг бол стиль нь өөрийн өвөрмөц хосгүй шинж чанараар бусдаас ялгарах зөвхөн хувцасны сайхнаар биш дүр төрхөөрөө онцлог байж биеэ авч явах байдлаараа бусдыг өөртөө татах зэрэг шинжүүдийг агуулж байдаг байна.
Мода  гэдэг нь нийгэм болон соёлын хүрээнд тодорхой хэсэг хугацаанд зонхилж буй сонирхол гоо зүйн таашаалын ноерхол юм. Түүхчид моод үүссэн цаг үеийг яг тодорхой тогтоогоогүй ч гэсэн олонхи мэргэжилтэнүүд XIV  зууны  сүүл XV зууны эхэн үед үүссэн гэж үздэг. Мода гэдэг үг нь “Modus” гэсэн латин үгнээс гаралтай. Хувцасны түүхээс үзэхэд шинэ мод, шинэлэг санаа бүхэн өөрийн үгүйсгэлтэйгээ хамт мэндэлдэг.  Дэлхийн улс үндэстнүүд эртний Рим, Грекүүд, Скифүүд ба Энэтхэг, Монгол, Хятад улс түмэн зөвхөн өөрийн гэсэн тодорхой төрлийг хүлээн зөвшөөрсөн хувцас хунарыг бий болгожээ. Хувцасны хэлбэрийг  өөрчлөх өөрчлөлт нь түүхэн цаг үетэйгээ холбоотой байв. Моодны түүх нь маш баялаг үйл явдлаар дүүрэн байдаг. Мода нь төрж эхлэхээс  мөхөх төгсгөлд хүртэл нийгмийн хөгжлөөс хамаарч хэдэн зуун, хэдэн арван жилийн турш ноерхож байсан бол өнөөдөр орчин үед модны амьдрах хугацаа улам багассаар нэг хоер жил бүр улирал улиралаар нь хэмжигдэх болжээ