"Хаан" банк орон сууцны зээлээ тавьж эхэлсэнээс хойш байрны үнэ огцом нэмэгджээ. Өнгөрсөн долоо хоногт л 50 саятай байсан байр энэ долоо хоногт даруй 10 сая төгрөгөөр өссөн харагдана. Хаа сайгүй хямралтай байгаа энэ үед долоохон хоногийн дотор 10 саяар өсөж байгаа нь арай л амьдралаас хол санагдана. Тиймээс холбогдох байгууллагууд нь үүнд анхаарлаа хандуулна биз ээ. Нэгэнт “Хаан” банктай холбоотой мэдээллийг сөхсөнийх нэгэн мэдээллийг уншигчиддаа сэрэмжлүүлэг болгох үүднээс хүргэж байна. "Хаан" банктай холбоотой хэл ам ер тасардаггүй. Тус банкнаас зээл аваад хувийн хөрөнгөө алдсан хүмүүс нэлээдгүй байдаг. Зээлийн хүү, хүүгийн хүү гээд янз бүрийн хүүнд нь толгой нь эргээд л хөрөнгөө алдах нь энүүхэнд байдгийн нэг жишээг дор дурьдая. Г.Даш гэгч иргэний “Хаан” банкнаас авсан зээлийн барьцаа болох нийслэлийн “А” зэрэглэлийн бүсэд багтах орон сууцны байрны 179 ам метр талбайг хурааж авах болоод байгаа гэнэ.
Нэг үгээр “Хаан” банкнаас гэрээний хугацаа дуусаагүй байхад түүний зээлийг найдваргүй зээлд тооцон эргүүлэн татахаар болж улмаар Сүхбаатар дүүргийн шүүхэд хандсан ажээ. Шүүхийн шийдвэр “Хаан” банкны талд гарч нэхэмжилсэн 124 сая 311 мянган төгрөгийг Г.Дашаас гаргуулахаар шийдвэрлэжээ. Шүүхйин нэхэмжлэл гарсаны дараа Г.Даш 21 сая төгрөг тушаасан боловч үлдсэн мөнгийг гаргуулахын тулд “Хаан” банк зээлийн барьцаа хөрөнгө болох “Ану” төвийн 2, 3 дугаар давхрыг дуудлага худалдаанд оруулах болжээ. Тухайн үед “Хаан” банкны тусгай активын газрын мэргэжилтэн С.Батмөнх болон газрын дарга Д.Ганбаатар нар иргэн Г.Дашид “уг обьектоор банкны нэр дээрх өрийг бүрэн хаана. Үлдсэн зөрүү мөнгийг буцааж олгоно” гэж мэдэгдсэн аж. Гэвч шүүхийн шийдвэр гарах үед уг байрыг хураасан актаар барьцааны барилгыг 150 сая төгрөгөөр үнэлэн хурааж авсан аж. Шүүхийн шийдвэр гарах үед уг байрны бодит үнэ ойролцоогоор 190 сая гаруй төгрөг байжээ. Гэтэл иргэн Г.Дашид танилцуулалгүйгээр үнийн дүнг бууруулан 50 сая төгрөгөөр “Экспэрт консалтинг” компанийн захирал Б.Энхдалайд зарсан байх юм. Б.Энхдалай нь тухайн үед “Хаан” банкинд гэрээт өмгөөлөгчөөр ажиллаж байсан гэнэ. Иргэн Г.Даш энэхүү хэргийг НШШГА, “Хаан” банкны ажилтанууд эхнээсээ зохион байгуулалттай үйлдсэн гэж үзэж байгаа гэнэ. Иргэн танд ч гэсэн ийм зүйл тохиолдохыг үгүйсгэх аргагүй юм
Factnews.mn