-Хохирогсдыг бүтэн жил залхааж байж нөхөн төлбөр олгохоор болсны учир-
“Долдугаар сарын 1-ний хохирогчид Ц.Нямдорж сайдтай уулзахыг хүссэн ч, тэрээр хүлээж авсангүй” гэх мэдээ өнгөрсөн жилийн аравдугаар сараас хойш хэвлэлийн хуудаснаас салаагүй. Тэднийг уулзах хүсэлт тавих, нөхөн төлбөр шаардах бүрд нь Ц.Нямдорж нүүр буруулж, зарим үед баривчлуулж байсан билээ. Харин одоо л ХЗДХ-ийн сайдтан гэнэт ухаан сууж, хохирогсдод нөхөн олговор олгох хэрэгтэйг “ойлгожээ”.
Өнгөрсөн долоо хоногийн сүүлчээр тэрээр долдугаар сарын 1-нд хохирогсдод нөхөн олговор олгох тухай хуулийн төсөл өргөн барив. Энэ нь нөгөө намын байранд байсан түрээслэгчид, машин унаа, байр байшингаа шатаалгасан хүмүүст хамаатай асуудал юм байх гэж бодтол харин ч шал өөр юм болж хувирав. Шуудхан хэлэхэд, эрхэм сайдтан МАХН-д шинэ байр барих арван хэдэн тэрбум төгрөгийг төрөөс гаргуулах гэж л энэ “гэгээн сайхан” санаачилгыг гаргажээ. МАХН-д тэр их мөнгөөр байр барьж өгөхийн тулд төрийн данс улайсан энэ хямралын үед төсвөөс, татвар төлөгчдийн мөнгийг гаргах юм бол яах аргагүй олон түмний эсэргүүцэлтэй тулгарна. Тийм болохоор хохирогсдод олгох багахан хэмжээний тэр мөнгөн дунд намын байр сүндэрлүүлэх мөнгөө Ц.Нямдорж сайтар нууж, “өөхөнд боосон бөөр” болгожээ.
МАХН олон давхар харшаа яаран барьж, арав гаруй тэрбум төгрөг зарцууллаа гээд ард түмний амьдралд өчүүхэн төдий ч хэрэг болохгүй, харин энэ хямралтай, мөнгө хомсодсон хэцүү үед тэр мөнгөөр түмэнд хэрэгтэй, улс орноо өөд татахад тус нэмэр болохоор юу хийж болох вэ гэдэг нь чухал. МАХН-ынхны хувьд дээрээс уламжилж ирсэн нэг зуршил бий. Наанаа сайн сайхан үйл хэрэг яриад араар нь өөрсдөдөө ашигтай юмаа амжуулдаг, ямар нэгэн томилгоо, найраагаа баяр наадмын үеэр, хүмүүсийн анхаарал өөр зүгт хандсан үед ар хударгаар нь “гялалзуулахдаа” гарамгай хүмүүс. Тэр л чадвараа энэ удаа Ц.Нямдорж гаргалаа. Уг хуулийн төсөл УИХ-аар батлагдах нь тодорхой. Нөхөн олговор энэ тэр олголоо гэх сайн нэр зүүх нь МАХН-д ашигтай, бас байрны мөнгөө ч төрөөс хэл амгүйхэн авчих нь гэж овоо сайн тооцоолжээ.
Мөн удахгүй Өршөөлийн хууль гарна. Гэхдээ АН, МАХН-ын алины нь автортой гарах вэ гэдэг бас л сонин. Нэг их сайн хүн болж, Өршөөлийн хууль гаргаснаараа өөрсдийгөө рекламдах гэж байгаа. Манай намын байрыг шатаасан тэр нөхдүүдийг шатааж цовдолъё гэх шахаад байсан УИХ-ын зарим гишүүн эдүгээ ичих ч үгүй Өршөөлийн хууль гаргана гээд гүйж явна. Ерөнхий сайд С.Баяр долдугаар сарын 2-ны үүрээр намын байраа эргэж, мэхийж бөхийж явахдаа “Баримт, нотолгоо сайн цуглуулсан биз. Буруутай хүмүүстай хатуу хариуцлага тооцох ёстой” хэмээн хөмхий зуун хэлж байсан. Гэтэл өнөөдөр танхимынх нь нэг гишүүн Ц.Нямдорж нөхөн олговор олгох гэж, намынхан нь гэмт хэрэгтэн гэгдээд байгаа нөхдийг өршөөх гээд сүйд майд яаран гүйлдэж байгаа нь энэ.
Гэхдээ энэ хүмүүсийг бүтэн жил залхааж, алдсан юмаа олж авах гэж дарга даамлуудын хаалгыг элээж явахыг нь үзэх гэж л ийнхүү цаг алдсан гэвэл худлаа. Иймэрхүү аргаар өөрсдийн хувийн эрх ашгаа нууж, төсвийн хөрөнгө түмний мөнгийг хуулийн дагуу мэт харагдуулж үрэн таран хийхдээ МАХН-ынхан ичих л хэрэгтэйсэн.
Ж.Цэсэн