|
|
|
(2008-07-03) |
Үймээн самууны хөлд өртсөн урлагийн байгууллагуудаар орж байдал газар дээр ямар байгаа талаар сурвалжлахыг зорилоо. Хамгийн түрүүн хохирол их амссан Улсын филармонид очтол Цагдаагийнхан оруулсангүй. Хувьсгалт намын төв байр, Соёлын төв өргөө орчмыг нэлд нь хамгаалалтад авсан тул дотогш нэг ч хүн оруулахгүй байлаа.
Улсын филармонийнхан гаднаа, өөрөөр хэлбэл Туушин компанийн талаас Соёлын төв өргөө рүү ордог ааркны гадаа бөөгнөрөн зогсч байв. Мэргэжлийн урлагийн бусад байгууллагын удирдлагууд, уран бүтээлчид нөхдөө сэтгэл санаагаар дэмжихээр ирсэн байв.
Ц.Батчулуун: Хөгжимчид маань ганц л ээлжийн хувцастай үлдлээ
Морин хуурын чуулгын удирдаач, ардын жүжигчин Ц.Батчулуунтай уулзлаа. -Танай чуулга үймээн дэгдээгчдийн хөлд илүүтэй өртжээ. Зурагтаар таныг нүднээсээ нулимс унаган ярьж байхыг харлаа. -Тайвшраад байна аа. Хүмүүс нэлээд харсан бололтой, утасдаж харамсч байгаагаа илэрхийлж, сэтгэл засч байна. -Хөгжим хэрэгслэлээс тань үлдсэн юм ер нь байна уу? -Юу үлдсэнийг яг таг хэлэх аргагүй байна. Морин хуур, ятга, ёочингууд лав алга. Тогтож, тоолж бүртгэх боломж алга. Одоогоор Цагдаагийни газраас ирсэн шинжээчид ажиллаж байгаа тул биднийг дотогш руу оруулахгүй байна. Өчигдөр орой өөр газар тоглолттой байсан болохоор хөгжимчид маань нэг ээлжийн хувцастайгаа үлдэх нь үлдсэн. Дотор, хувцасны өрөөг онгичоод хаячихсан, ундуй сундуй байна. Юу үлдсэнийг мэдэхгүй байна.
Д.Ухнаа: Наадмын шоуны гурван сая төгрөг аваад явчихаж
Урлагийн гавьяат зүтгэлтэн Д.Ухнаатай уулзахад: -Эрх чөлөө гэж энийг хэлдэггүй юм. Замбараа цадиг гэж байх ёстой. Арай хэтэрч байна.
-Та “Соёл -Эрдэнэ” хамтлагийн өрөөнд суудаг байх аа? -Тийм. Байхгүй ээ, байхгүй. Юу ч үлдээгээгүй цөлмөчихөж. Наадмын шоунд зарцуулах ёстой гурван сая төгрөг аваад явчихаж.
-Сейфтэй нь үү? -Эвдээд. Даргын өрөөний сейфийг тэр чигээр нь өргөөд явчихсан байна. Би зуслан гарах юм байна, хаанаа хийж явах вэ гээд тэр гурван саяыг өрөөндөө орхичихсон байхгүй юу.
-Бас танайхны хувцсыг талбайгаар нэг цацчихсан байсан гэв үү? -Хувцас ч дүүрч ээ. Миний костюмуудын сайнаас нь шилээд, бас болоогүй эвхээд уутанд нь хийгээд явжээ. Уутнууд нь алга. Тэгээд бас ширээ тойрч суугаад архидсан байгаа юм.
-Та өрөөндөө хэзээ орсон юм? -Өглөө есөн цагт. Гуйж байж орсон л доо.
Д.Энхцэцэг: Одоогоор хохирлын хэмжээг тогтоох боломжгүй байна
Уран зургийн галерей руу цагдаа нар оруулахгүй байсан тул захирал Энхцэцэгтэй нь утсаар холбогдлоо. -Одоогоор Мөрдөн байцаах газраас ирсэн шинжээчид ажиллаж байна. Хохирлын хэмжээг тогтоох боломжгүй байна. Монгол зургийн фондод гал хүрчээ. Модон хаалга нь бүрэн шатсан. Хэт халуунаас болсон байх, манай бүх цонх хагараад, раамууд нь яйжийчихсан. Баримал, жижиг урлалын бүтээлүүд энд тэнд хага бут үсэрсэн байдалтай таржээ. Миний бодлоор гал унтраах, ус шүрших явцад ингэж ийш тийш шидэгдсэн бололтой. Тухайн үед байшинг галаас аврах нь л чухал байсан байх л даа. Галерейн үзмэрүүдээс зөөж хамгаалсан л даа. Гэсэн ч маш их хэмжээний хохирол амслаа. | |
End solongosiin irgentei ger b ul bolj bgaa hunii bichig barimt,mgld bataluulj ugnu.01097409854