2008 оны УИХ-ын сонгууль нэг талаар хөрөнгө чинээгээ гайхуулсан хүмүүсийн далд тулаан болж өнгөрлөө гэхэд болно. Учир нь манайдаа л мөнгөтэй хөрөнгөтэйгөөрөө гайхуулдаг бүх хүн энэ сонгуульд нэр дэвшлээ шүү дээ. Хүнс, бараан захын боссууд, том том компаний захиралууд, сайд түшмэд, аймаг дүүргийн засаг дарга нар гээд түрийвчээ түнтийтэл зузаалсан мөнгөтэй хүмүүс эр эмгүй энэ жилийн сонгуульд өрсөлдлөө. Тиймээс энгийн олон нийт энэ олон баячуудаас хэн нь хамгийн их баян тарганаа гайхуулж, хамгийн их хөрөнгийг баруун солгойгүй цацав гэсэн судалгаа маягийн юм далдхан явуулж нэг хоёрдугаар байр эзлүүлчихсэн байгаа нь сонин байв. Яг үнэндээ мөнгө цацаагүй нэг ч нэр дэвшигч байхгүй. Хамгийн наад захын “ядуухан” бие даагч хүртэл 100 сая төгрөгийг сонгуульдаад үрчихсэн гэж бодохоор парламентад гарч ирэх гэсэн хүмүүсийн тэмцэлдээний үнэ ханш ерөнхийдөө ойлгогдоно. Ингээд энэ жилийн сонгуулийн сурталчилгаанд cap гаруй хөлөө цуцтал гүйсэн хүмүүсийн сэжиг таамаг дээр үндэслэн гаргасан хэн гээч бэл бэнчин, буян нүнжигтэй аавын хүү хэдэн зоос үрсэн талаархи судалгаа маягийн зүйлийг хамтаа сонирхоё. Мэдээж энэ судалгаа яг таг зөв, үндэслэлтэй биш ч ор мөртэй байж мэднэ гэдгийг дурдах нь зүйтэй болов уу. Сонгуулийн сурталчилгаанд зүтгэгчдийн ярьж буйгаар бол энэ жилийн сонгуульд Чингэлтэй дүүрэгт АН-аас нэр дэвшсэн экологич Г.Баярсайхан лав нэлээдгүй мөнгө зарсан хүний тоонд багтаж буй бололтой. Тэрбээр сонгуулийн сурталчилгаа дуусахаас тав хоногийн өмнө л гэхэд элбэг хоёр тэрбум төгрөг сонгуульд цацчихаад байсан ажээ. Тэгвэл Баянзүрх дүүргээс нэр дэвшсэн “Бридж”-ийн Ганхуяг гишүүн л гэхэд энэ сонгуульд гурван тэрбум төгрөг цацсан гэж явуулын ухуулагчид таамаглаж буй ажээ. Гэхдээ энэ арай л хэтрүүлсэн таамаглал болов уу. Учир нь эрхэм гишүүн маань сонгуулийн өмнөхөн Авилгалтай тэмцэх газарт гаргасан хөрөнгө оруулгын мэдүүлэгтээ хөдөө айлын хотонд байгаа хэдэн малаа хүртэл оруулаад өөрийгөө хоёр тэрбумын хөрөнгөтэй гэж мэдүүлсэн байсан. Хэрвээ дээрхи яриа үнэн бол эрхэм гишүүн маань хамаг хөрөнгөө сонгуульд шавхсанаар барахгүй бүр өрөнд ороод үлдсэн бололтой. Ингэж хамаг байдагаа шавхсан хүн УИХ-д гарч байж л шархаа нөхөхөөс өөр аргагүй болдог байх даа. Харин Сонгинохайрхан дүүрэгт нэр дэвшсэн сүмочин Кёкүшюзан Д.Батбаяр ч бас энэ сонгуульд хамгийн их мөнгө цацсан бийлэгжүү нэгнээр тодрох магадлал өндөр байгаа аж. Тэрбээр өмнө нь тус дүүрэгт хийж бүтээсэн зүйлээрээ ч бусад нэр дэвшигчидээс толгой илүү бөгөөд энэ удаагийн сонгуульд даруй таван тэрбум төгрөг цацсан хэмээн явуулын ухуулагчид магтаж буй ажээ. Магадгүй бөх хүн болохоор хүч бяр илүү байх ёстой гэж тооцоолоод ийнхүү таван тэрбумыг шидсэн байж ч болох л юм. Түүнчлэн Завхан аймгаас УИХ-ын сонгуульд хүч үзсэн Нарантуул”-ын босс Ш.Сайхансамбуу энэ удаагийн сонгуульд долоон тэрбум төгрөг цацсан гэдэг яриа ч бас хөдөөнөөс дуулдаж байна лээ. Үнэн бол Кёкүшюзан маань бэл бэнчинтэй нэр дэвшигчдийн магнай байхаа болиод хоёрдугаар байр луу ухарч байна гэсэн үг. Гэхдээ дээр нэр дурдсан экологич Г.Баярсайхан сонгуулийн өмнөхөн 1-р сургуулийн өмнөх саарал байшингаа найман тэрбумаар зараад бүгдийг нь сонгуульд цацахаар төлөвлөсөн гэдэг яриа сонсогдож байсан. Хэрвээ тэр мөнгөө бүгдийг нь цацчихсан бол “Нарантуул”-ын Сайхансамбуу ч бас л тэргүүн зэргийн байраа алдаж мөнгөн медаль дээр унаж байгаа юм. Монголын ард түмний улс төрийн “Олимп-2008″-ын алт, мөнгө, хүрэл медалийн телөө эдүгээ ийм л хүмүүсийн нэр тодорч бэл бэнчингээ шалгаж байгаа сурагтай. Яваандаа хэн хэдийг гаргасан нь бүр ч тодорхой болох биз ээ. Гэхдээ 2000 оны УИХ-ын сонгуульд “Эрэл”-ийн Эрдэнэбат 10 тэрбумыг цацаж байсантай харьцуулахад ард түмэндээ зориулах мөнгөн дээр нэр дэвшигчдийн гар улам л татуу болоод байх шиг.