Бүсгүй минь бачимдаж бүү уурла!
Балга тагш юм уугаа л биз
Балай болтлоо согтож ирчихээд
Гал залгисан мэт ойж буун үсчиж
Галав юүлэв үү гэмээр түйвээгээгүй л бол
Халамцуухан орж ирчихээд
Гэмшингүй царайчлах ханиа
Өргөстэй харганаар ороолгох мэт
Өөдгүй муу үгээр бүү ут
Өөнтөглөж хэрүүл өдөхийн оронд
Эрлэгийн элчийг ч уярааж буцаах
Энхрий ялдам харцаараа аргадаж
Зүгээр дээ хонгор минь зүгээр гэж
Зүрхэнд нь хүртэл зөөлхөн шивнээрэй
Бодсон санасан нь бүтэлгүйтэж бүдэрвэл
Бачуурсан сэтгэлээ тайтгаруулах гэж нэг ууна
Азын од магнайд нь харваж
Амжилтын түлхүүр гартаа атгавал
Ааграхан омогрохож онгирч нэг ууна
Тайтгарах гэсэндээ балгачихаад тэнцэж ядан ирхэд нь
Тээршааж ярвайн угтах хэрэггүй
Зовлонг нь хугаслах л гэж ханилсан юм чинь
Зөөллөж аргадаад ханийн түшгийг мэдрүүлээрэй
Амжилтаа тэмдэглэж ажлынхантайгаа наргичихаад
Амраг ханьдаа дуулгахаар яаран яаран ирхэд нь
Жавартай харцаар шилбүүрдэх хэрэггүй
Жаргалаа хуваалцах гэргий нь чи болохоор
Жавар үргээх хайраа дэлгэж угтаарай