ОХУ-ын соёл, түүхийн төв болох Санкт-Петербург хотод нэгэн шуугиан дэгдлээ. Сургуулийн сурагчид бие биедээ дурлаж, улмаар дотно харьцаанд орж, хүүхэдтэй болжээ. Алдарт Ромео Жульеттагийн түүх давтагдлаа. Гэхдээ тэд хайр сэтгэлтэй байсан ч хүүхэд төрүүлж байгаагүй юм шүү дээ.

Ксюша 13-тай, харин түүний найз хөвгүүн Гоша 15-тай. Тэднийг хүмүүс жирийн л сайхан, хүүхэд насны гэнэн томоогүй зангаар үерхэж нөхөрлөж байна гэж боддог байсан тул нэг их анзаардаггүй байж. Хичээлийн шинэ жил эхэлснээс хойш  ангийнх нь багш Ксюшаг огцом жин нэмж байгааг гэнэт анзаарсан гэнэ. Дараа нь охин өдөр өдрөөр томорч байгаа гэдсээ нуух гэж хэлхгэр хувцас өмсч эхэлснийг ч олж харжээ. Тэрээр охины ээжийг дуудаж уулзан, эмэгтэйчүүдийн эмчид дагуулж очоод үзүүлтэл долоон сартай жирэмсэн болох нь тогтоогдсон байна.

Ингээд охиныг шууд л гэрийн сургалтанд шилжүүлж, харин найз нөхөд, ангийнханд нь Ксенияг хүндээр өвдсөн, эмнэлэгт хэвтэж байгаа гэж хэлсэн байна. Удалгүй охин хугацаанаасаа өмнө амаржиж, 3800 грамм жинтэй, 52 см өндөртэй “аварга” хүү төрүүлсэн төдийгүй хөхөөрөө хооллож эхэлсэн гэнэ. Орчин үеийн Ромео, Жульеттагийн энэ түүхийн гэгээлэг тал нь нөхөрлөл-хайр-эрүүл хүүхэд. Мэдээж энэ хэрэг цагдаагийн хараанаас мултарсангүй. Шалгаж эхэлсэн боловч 13, 15 настай хүүхдүүдэд ийм тохиолдолд шийтгэл оногдуулах, хариуцлага хүлээлгэх тухай заалт ОХУ-ын Эрүүгийн хуулинд тусгагдаагүй байдаг аж. Тиймээс охин ч тэр, хөвгүүн ч тэр шийтгэл хүлээгээгүй байна. Харин ийм зүйл анзаараагүй эцэг эх болон сургуулийн захиргааг хатуухан зэмлэл хүлээж байгаа аж.