Өнгөрсөн 7 хоногт Монголбанкны Ерөнхийлөгчийн тушаалаар амины орон сууцанд 8%-ийн зээлийг олгохоор болсон. Энэ асуудал хэзээнээс хэрэгжиж иргэдэд хэзээ авч эхлэх нь одоогоор тодорхойгүй байна.

Гэвч энэхүү зээлийг хэн авах вэ? гэдэг нь хамгийн түрүүнд тавигдах гол зүйл нь.

Юуны түрүүнд ямар орон сууцыг амины орон сууц гэх вэ? гэдэг ойлголтыг зөв авах нь зүйтэй байх.

Орон сууцны ипотекийн санхүүжилтийн журамд амины орон сууцыг аймаг, сумын хөгжлийн ерөнхий төлөвлөгөөнд тусгагдсан газар, орон сууцны хотхон, хорооллын хэсэгчилсэн төлөвлөгөөний дагуу баригдаж, эрх бүхий байгууллагын шийдвэрээр ашиглалтанд орсон цахилгаан, дулаан, ус, бохирын асуудлыг нь шийдсэн байна гэж тодорхойлсон байдаг.

Амины орон сууц нь өөрийн газартай байх ба өмчлөх гэрчилгээтэй, эс бөгөөс эзэмших эрх нь 20 жилээс дээш хугацаатай байх гэсэн шаардлага өмнөх журам дээр нэмэгдсэн.

Орон сууцны ипотекийн зээлийн журамд уг зээлд дараах шалгууруудыг хангасан иргэн хамрагдах боломжтой.

Монгол улсын иргэн бөгөөд эрхзүйн чадамжтай 18 нас хүрсэн байна.
Банк, санхүүгийн байгууллагад хугацаа хэтэрсэн болон чанаргүй зээлийн үлдэгдэлгүй, шүүхийн шийдвэрийн дагуу төлөх өр, төлбөргүй байна.
Өрхийн гишүүний аль нэг нь Төрийн албан хаагчдыг орон сууцжуулах хөтөлбөрийн дагуу авсан орон сууцны зээлийн үлдэгдэлгүй.
Мөн өрхийн гишүүний аль нэг нь Иргэдийг жилийн 6%-ийн хүүтэй орон сууцны хөнгөлттэй зээлд хамрагдсан бол уг зээлийн үлдэгдэлгүй гэсэн шаардлагуудыг хангасан байхад Амины орон сууцны 8%-ийн зээлэнд хамрагдах хүсэлтээ уг зээлийг олгож буй аль банкинд өгч болохоор байна.

Одоогоор амины орон сууцны зээлийг аль нэг арилжааны банк олгож эхлээгүй байгааг анхааруулах хэрэгтэй байх.

Амины орон сууцны зээл нь

хугацаа нь 20 жил
зээлийн хүү нь 8% +/-1хувь
Урьдчилгаа төлбөр нь 30%-иас доошгүй
Өрхийн нийт зээл нь өрхийн орлогын 45%-аас бага
Амины орон сууцны зээлийн барьцаа нь зээл авч буй амины орон сууц, ашиглагдаж байгаа 80м2-аас дээшгүй талбайтай хуучин орон сууц
Зээлийг урьдчилан төлөлт хийх боломжтой
Тогтмол хүүтэй байхаар тус тус журамлагдсан байна.