Дэлхийг аврах цорын ганц найдвар
Элдэв осол сүйрэл, донсолгоо болон хүмүүст заналхийлж буй янз өвчин ойрын үед дэлхийн хүн амын өсөлтөд болон хүн төрөлхтөний ирээдүйд онцгой нөлөө үзүүлэхгүй гэсэн дүгнэлтийг Австралийн экологийн эрдэмтэд хийжээ.
Мэргэжилтнүүд ДЭМБ болон АНУ-ын хүн амын тооллогын товчооны хүн ам зүйн мэдээ баримтад дүн шинжилгээ хийсэн байна.
Төрөлт болон нас баралт тогтвортой байх нөхцөлд 2100 он гэхэд дэлхийн хүн ам 10,4 тэрбумд дөхөж очих ёстой гэдгийг эрдэмтэд тооцоолжээ. Энэ явцад сунжирсан дайн юмуу дэлхийн цаг уурын өөрчлөлт ч хүн ам зүйн байдал муудахад дорвитой нөлөө үзүүлэхгүй гэдгийг Австралийн эрдэмтдийн хийсэн шинэ судалгаа харуулсан байна.
Дайн тулаан, тахлын хэмжээнд хүрсэн халдварт өвчин ч хүн төрөлхтөний өсөлтийг зогсоож чадахгүй бөгөөд энэ нь өөрөө хамгийн том аюул юм хэмээн тэд үзжээ. Учир нь хүн амын хэмжээ дэлхийн даацаас хэтрэх үед манай гаригийн бүхий л эрдэс баялаг шимэгдэж экологийн сүйрэлд тулах аюултай бөгөөд энэ л жинхэнэ дэлхийн гамшиг юм гэжээ.
“ХХ зууны дэлхий нийтийг хамарсан мөргөлдөөнтэй харьцуулж болох тооны хүмүүс алагдаж, шархдаж болох дэлхийн гуравдугаар дайн гарлаа ч дэлхийн хүн амын өсөлтөд маш сул нөлөөлөх нь бидний гайхашралыг төрүүлсэн” гэж профессор Бэрри Брук хэлжээ.
Африкийн одоогийн Эбола вирусийн өвчнөөс илүү аюултай вирус, цар дэгдэлт хүн төрөлхтөнд аюул учруулж, үүний улмаас 2 тэрбум хүн нас барлаа ч, 2100 он гэхэд дэлхийн хүн 8,4 тэрбумын хэмжээнд байх ажээ. Гэр бүлийн хүүхдийн тоог нэг хүртэл хязгаарласнаар энэ зууны эцэс гэхэд өнөөдрийн 7 тэрбум гэсэн тоо ч хэвээр байх юм.
Ингэхдээ төрөлтөд тавих хяналт биш, харин шинэ технологийн хөгжил, хүрээлэн байгаа орчныг хэвээр хадгалах тухай хууль дүрмийг мөрдөх явдал дэлхийн хүн амыг аврах цорын ганц найдвар гэдэгт австралийн эрдэмтэд итгэлтэй байна. Чухамхүү үүнд анхаарлаа хандуулахыг экологчид дэлхийн хүн ардад зөвлөж байна.
С.Инда